माजी भारतीय कर्णधार रोहित शर्मा यांना ‘पद्मश्री’ पुरस्काराने सन्मानित करण्यात आले आहे. हा सन्मान आपल्या आणि आपल्या कुटुंबासाठी अत्यंत खास क्षण असल्याची भावना व्यक्त करत रोहितने भारतासाठी सामने जिंकण्याचा प्रयत्न कायम ठेवणार असल्याचे सांगितले.
‘पद्मश्री’ हा सन्मान मिळाल्याबद्दल रोहित शर्माने आपल्या क्रिकेट कारकिर्दीत साथ देणाऱ्या सर्वांचे आभार मानले.
दूरदर्शन स्पोर्ट्सने सोशल मीडिया प्लॅटफॉर्म ‘एक्स’वर शेअर केलेल्या व्हिडिओमध्ये रोहित म्हणाला, “पद्मश्री मिळणे हा माझ्या आणि माझ्या कुटुंबासाठी खूप खास क्षण आहे. या सन्मानासाठी मी भारत सरकारचे मनःपूर्वक आभार मानतो. माझ्या कारकिर्दीत ज्यांनी महत्त्वाची भूमिका बजावली त्या सर्वांचा मी ऋणी आहे. देशासाठी सामने आणि ट्रॉफी जिंकण्याचा माझा प्रयत्न कायम सुरू राहील. धन्यवाद. जय हिंद.”
रोहित शर्माने २००७ साली आंतरराष्ट्रीय क्रिकेटमध्ये पदार्पण केले. गेल्या १९ वर्षांत तो तिन्ही फॉरमॅटमध्ये भारतातील सर्वोत्तम खेळाडूंमध्ये गणला गेला. फलंदाज आणि कर्णधार म्हणून त्याने भारतीय क्रिकेटवर ठसा उमटवला आहे.
रोहितच्या नेतृत्वाखाली भारताने टी-२० विश्वचषक २०२४ जिंकत या सर्वात लहान फॉरमॅटमधील आयसीसी किताबाची प्रतीक्षा संपवली. त्यानंतर पुढील वर्षी चॅम्पियन्स ट्रॉफी २०२५चाही मान भारताला मिळवून दिला.
टेस्ट कारकिर्दीत रोहितने ६७ सामने खेळले असून ११६ डावांत ४०.५७ च्या सरासरीने ४,३०१ धावा केल्या. यात १२ शतके आणि १८ अर्धशतके झळकावली.
वनडे क्रिकेटमध्ये त्याने २८२ सामन्यांत ४८.८४ च्या सरासरीने ११,५७७ धावा केल्या आहेत. या काळात त्याच्या नावावर ३३ शतके आणि ६१ अर्धशतके नोंदवली गेली.
रोहितने भारतासाठी १५९ टी-२० सामने खेळले असून ५ शतके आणि ३२ अर्धशतकांसह ४,३२१ धावा केल्या आहेत. त्यामुळे तो या फॉरमॅटमधील सर्वात यशस्वी फलंदाजांपैकी एक ठरला आहे.
जरी रोहित शर्माने टेस्ट आणि टी-२० फॉरमॅटमधून निवृत्ती घेतली असली, तरी वनडेमध्ये तो अजूनही संघासाठी दमदार कामगिरी करत आहे. चाहत्यांची इच्छा आहे की, रोहितने २०२७ चा वनडे विश्वचषक खेळावा.
