भारताची प्रमुख एरोस्पेस कंपनी हिंदुस्तान एरोनॉटिक्स लिमिटेड (HAL) ला स्वदेशी हेलिकॉप्टर निर्मितीच्या क्षेत्रात मोठे यश मिळाले आहे. HAL ने पवन हंसकडून १,८०० कोटींची ऑर्डर मिळवली असून, त्याअंतर्गत कंपनी १० Dhruv-NG (नेक्स्ट जनरेशन) हेलिकॉप्टर्सचा पुरवठा करणार आहे.
Dhruv-NG हा HAL ने विकसित केलेल्या स्वदेशी Dhruv चा सुधारित अवतार असून, नागरिक, संरक्षण आणि युटिलिटी वापरासाठी अधिक सक्षम वैशिष्ट्यांसह डिझाइन करण्यात आला आहे. या हेलिकॉप्टरमध्ये प्रगत एव्हिएशन, सुधारित कार्यक्षमता आणि उच्च सुरक्षा मानकांचा समावेश आहे. सरकारी हेलिकॉप्टर सेवा कंपनी पवन हंस विविध मोहिमांसाठी या हेलिकॉप्टर्सचा वापर करणार असून, त्यामुळे तिची ऑपरेशनल क्षमता आणि बहुउद्देशीय उपयुक्तता वाढणार आहे.
दरम्यान, HAL ने रशियाच्या PJSC युनायटेड एअरक्राफ्ट कॉर्पोरेशन (UAC) सोबत एक महत्त्वाचा संयुक्त उपक्रम (जॉइंट व्हेंचर) केला आहे. या भागीदारीअंतर्गत भारतात सुखोई SJ-100 सुपरजेट विमानाचे उत्पादन केले जाणार आहे. SJ-100 हे ट्विन-इंजिन, नॅरो-बॉडी क्षेत्रीय प्रवासी विमान असून, ते आधीच जागतिक पातळीवर व्यावसायिक सेवेत आहे. सध्या १६ एअरलाइन्सच्या ताफ्यात या प्रकारची २०० हून अधिक विमाने कार्यरत आहेत. या करारानुसार, भारतातील अंतर्गत वापरासाठी SJ-100 चे उत्पादन करण्याचा अधिकार HAL ला मिळणार आहे. हा करार अशा वेळी झाला आहे, जेव्हा भारत हा जगातील सर्वात वेगाने वाढणाऱ्या विमान वाहतूक बाजारांपैकी एक आहे. पुढील दशकात प्रादेशिक संपर्क वाढवण्यासाठी देशाला २०० हून अधिक रिजनल जेट्सची गरज भासेल, असा अंदाज आहे.
HAL आणि UAC यांच्यातील हे सहकार्य गेल्या ऑक्टोबरमध्ये झालेल्या सामंजस्य कराराचा (MoU) विस्तार आहे, ज्यामध्ये नागरी कम्यूटर विमानांच्या उत्पादनावर सहमती झाली होती. HAL च्या मते, UDAN प्रादेशिक संपर्क योजनेअंतर्गत कमी अंतराच्या उड्डाणांसाठी SJ-100 हा एक प्रभावी पर्याय ठरू शकतो. या कराराअंतर्गत विमानाचे स्थानिक प्रमाणन, उत्पादन आणि विक्री परवाना HAL कडे असेल, तर UAC तांत्रिक सहाय्य, डिझाइन सेवा आणि तज्ज्ञ सहकार्य प्रदान करेल.
हे ही वाचा:
“युरोपशी झालेल्या करारामुळे भारत भू-राजकारणाच्या शिखरावर”
वरळीच्या जेट्टीवर आता उतरणार हेलिकॉप्टर्स
मुंबईत पोलिसांच्या वेशात केनियन महिलेची केली ६६ लाखांची लूट
“इराणविरुद्ध कारवाई करण्यास अमेरिकन सैन्य तयार”
याशिवाय, विंग्स इंडिया २०२६ या आंतरराष्ट्रीय विमानन प्रदर्शनादरम्यान UAC ने भारतीय कंपनी फ्लेमिंगो एअरोस्पेससोबत सहा इल्यूशिन Il-114-300 विमाने पुरवठा करण्याचा करारही केला आहे. या सहकार्यामध्ये असेंब्ली, सुधारणा, देखभाल, दुरुस्ती, ओव्हरहॉल आणि पायाभूत सुविधा विकासाशी संबंधित क्षमतांचा विस्तार करण्यासाठीचा रोडमॅप समाविष्ट आहे.
