कर्नाटकात काँग्रेसने गायली २ कडवी, भाजपाने गायले संपूर्ण वंदे मातरम

कर्नाटक विधानसभेच्या विशेष अधिवेशनाच्या पहिल्याच दिवशी ‘वंदे मातरम्’च्या गायनावरून सत्ताधारी काँग्रेस आणि विरोधी भाजपमध्ये संघर्ष निर्माण झाला. विधानसभेच्या कामकाजाच्या सुरुवातीला ‘वंदे मातरम्’चे अधिकृत ध्वनिमुद्रण सुरू करण्यात आले; मात्र ते पहिल्या दोन कडव्यांनंतर थांबवण्यात आले. त्यानंतर भाजपच्या आमदारांनी आक्षेप घेत उर्वरित कडवी स्वतः म्हणण्यास सुरुवात केली.

कर्नाटक सरकारने ८ सप्टेंबर रोजी जारी केलेल्या आदेशानुसार, राज्य सरकारच्या कार्यक्रमांमध्ये आणि अधिकृत समारंभांमध्ये ‘वंदे मातरम्’ची केवळ पहिली दोन कडवी गायली जाणार आहेत. मात्र, राष्ट्रपती, उपराष्ट्रपती, पंतप्रधान किंवा राज्यपाल उपस्थित असलेल्या कार्यक्रमांना या नियमातून अपवाद ठेवण्यात आला आहे. या निर्णयाला भाजपने विरोध केला होता.

कर्नाटक विधानसभेचे तीन दिवसांचे विशेष अधिवेशन सोमवारपासून सुरू झाले. राज्यातील गंभीर दुष्काळाची परिस्थिती तसेच पश्चिम घाटावरील कस्तुरीरंगन समितीच्या अहवालामुळे निर्माण होणारे परिणाम यावर या अधिवेशनात चर्चा होणार आहे.  ‘वंदे मातरम्’चे गायन दोन कडव्यांनंतर थांबल्यानंतर विधानसभा अध्यक्ष जी. एस. पाटील यांनी दिवंगत मान्यवरांना श्रद्धांजली वाहण्याची प्रक्रिया सुरू केली. त्यानंतर मुख्यमंत्री डी. के. शिवकुमार यांनी २७ ऑगस्ट रोजी निधन झालेल्या माजी आमदार आर. बी. शिरियन्नावर यांना श्रद्धांजली वाहण्यास सुरुवात केली. मात्र, ‘वंदे मातरम्’ पूर्ण न गायल्यामुळे भाजप आमदारांनी आक्षेप घेतला. त्यांनी सभागृहातच उर्वरित कडवी म्हणण्यास सुरुवात केली आणि काँग्रेस सरकारविरोधात घोषणाबाजी केली.

हे ही वाचा:

गुजरातमध्ये मातीपासून बनलेल्या २३ हजार गणेशमूर्ती विकून कमावले ५ कोटी

जंगल वॉरफेअर ते ड्रोन वॉरफेअर; भारत-अमेरिकेच्या जवानांचा युद्धसराव

कबड्डीत भारताने जपानचा उडवला धुव्वा!

मागण्या पूर्ण होईपर्यंत होर्मुझची सामुद्रधुनी खुली करणार नाही!

विधान परिषदेतही भाजपचा विरोध

विधानसभेप्रमाणेच कर्नाटक विधान परिषदेतही ‘वंदे मातरम्’वरून वातावरण तापले. सभागृहात अधिकृतपणे गीताची दोन कडवी झाल्यानंतर भाजपच्या सदस्यांनी उर्वरित कडवी स्वतः म्हणण्यास सुरुवात केली. त्याच वेळी विधान परिषदेचे सभापती सलीम अहमद यांनी प्रथेप्रमाणे भारतीय संविधानाच्या उद्देशिकेचे वाचन सुरू केले. भाजप सदस्यांनी मात्र सरकारने ‘वंदे मातरम्’ पूर्ण न वाजवल्याच्या निषेधार्थ घोषणाबाजी सुरू ठेवली.

विशेष अधिवेशन सुरू होण्यापूर्वीच भाजपने स्पष्ट केले होते की, सरकारने ‘वंदे मातरम्’चे गायन दोन कडव्यांपुरते मर्यादित केले तर भाजपचे आमदार सभागृहात संपूर्ण गीत म्हणतील. भाजप आमदार एस. आर. विश्वनाथ यांनी यापूर्वी राज्य सरकारच्या निर्णयाला विरोध करताना, ‘वंदे मातरम्’ दोन कडव्यांनंतर थांबवण्यात आले तर भाजप आमदार पूर्ण गीत म्हणतील, असे सांगितले होते. त्यामुळे सोमवारच्या अधिवेशनात घडलेली घटना ही भाजपने आधी जाहीर केलेल्या भूमिकेनुसारच होती.