परदेश फिरायचंय? मग बाली ठरू शकतो सर्वात किफायतशीर पर्याय

परदेशात फिरण्याचं स्वप्न अनेक जण पाहतात, मात्र प्रचंड खर्चामुळे ते अनेकदा पुढे ढकललं जातं. पण इंडोनेशियातील बाली हे असे पर्यटनस्थळ आहे, जे कमी बजेटमध्येही आंतरराष्ट्रीय सहलीचा शानदार अनुभव देऊ शकते. निसर्गरम्य समुद्रकिनारे, आलिशान व्हिला, प्राचीन मंदिरे, वॉटर स्पोर्ट्स आणि समृद्ध संस्कृती यामुळे बाली भारतीय पर्यटकांच्या ‘विश लिस्ट’मध्ये आघाडीवर आहे. विशेष म्हणजे, योग्य नियोजन आणि आगाऊ बुकिंग केल्यास दोन जणांची पाच ते सहा दिवसांची बाली ट्रिप अपेक्षेपेक्षा कमी खर्चात पूर्ण होऊ शकते.

बाली सहलीतील सर्वात मोठा खर्च विमानप्रवासाचा असतो. भारतातील मुंबई, दिल्ली, बेंगळुरू आणि चेन्नईसारख्या शहरांतून बालीसाठी थेट तसेच कनेक्टिंग फ्लाइट्स उपलब्ध आहेत. प्रवासाचा हंगाम, तिकीट बुक करण्याची वेळ आणि एअरलाइननुसार दोघांच्या ये-जा विमान तिकिटांसाठी साधारण ₹४०,००० ते ₹७०,००० इतका खर्च येऊ शकतो. ऑफ-सीझनमध्ये किंवा काही महिन्यांपूर्वी तिकीट बुक केल्यास यात चांगली बचत होऊ शकते.
हे ही वाचा:
दहिसरमध्ये दुधात पाणी मिसळून ब्रँडेड पॅकेट विकले, एकाला अटक

पीओके पुन्हा पेटणार? पाकिस्तान सरकारला ४८ तासांचा अल्टिमेटम

राहण्याच्या बाबतीत बालीमध्ये प्रत्येक बजेटसाठी पर्याय उपलब्ध आहेत. बजेट हॉटेलपासून ते खासगी स्विमिंग पूल असलेल्या लक्झरी व्हिलापर्यंत अनेक पर्याय पर्यटकांना मिळतात. दोन जणांसाठी पाच ते सहा रात्रींच्या मुक्कामाचा खर्च साधारण ₹२०,००० ते ₹४०,००० इतका येऊ शकतो. हनिमून कपल्समध्ये खासगी व्हिलांची विशेष मागणी असते.

बालीमध्ये खाण्यापिण्याचाही खर्च तुलनेने कमी आहे. स्थानिक खाद्यपदार्थांबरोबरच भारतीय रेस्टॉरंट्सही मोठ्या प्रमाणात उपलब्ध आहेत. दोन जणांच्या एका दिवसाच्या जेवणासाठी साधारण ₹२,००० ते ₹३,००० खर्च अपेक्षित असतो. पाच दिवसांच्या मुक्कामात अन्नासाठी ₹१०,००० ते ₹१५,०००चे बजेट पुरेसे ठरू शकते.

स्थानिक पर्यटनासाठी स्कूटर भाड्याने घेणे हा सर्वात लोकप्रिय आणि किफायतशीर पर्याय मानला जातो. याशिवाय खासगी कॅब, डे-टूर पॅकेज आणि गाइडेड ट्रिप्सची सुविधाही उपलब्ध आहे. उलुवातू मंदिर, तनाह लोट, उबुद, नुसा पेनिडा, सेमिन्याक आणि कुटा बीच यांसारखी प्रसिद्ध ठिकाणे पाहण्यासाठी तसेच वॉटर स्पोर्ट्सचा आनंद घेण्यासाठी स्वतंत्र खर्च गृहित धरावा लागतो.

एकूणच, विमानप्रवास, हॉटेल, स्थानिक वाहतूक, जेवण आणि पर्यटनस्थळांचा खर्च मिळून दोन जणांची बाली सहल साधारण ₹९० हजार ते ₹१.४० लाख या बजेटमध्ये पूर्ण होऊ शकते. लक्झरी सुविधा निवडल्यास खर्च वाढू शकतो, तर ट्रॅव्हल ऑफर्स आणि आगाऊ नियोजनाचा लाभ घेतल्यास ही सहल लाख रुपयांच्या आतही पूर्ण करणे शक्य आहे. त्यामुळे परदेशात फिरण्याचा विचार करत असाल, तर बाली हा सौंदर्य, साहस आणि किफायतशीर खर्च यांचा उत्तम संगम ठरू शकतो.