अमेरिकेचे राष्ट्राध्यक्ष डोनाल्ड ट्रम्प यांनी इराणसोबत शांतता कराराची घोषणा केली. यानंतर जागतिक बाजारातील सकारात्मक वातावरणाचा परिणाम अपेक्षेप्रमाणे भारतीय शेअर बाजारावरही दिसून आला. आठवड्याच्या पहिल्याच व्यवहारदिनी सोमवारी भारतीय शेअर बाजाराने जोरदार उसळी घेत हिरव्या निशाणावर सुरुवात केली. बीएसई सेन्सेक्स आणि एनएसई निफ्टी-५० या दोन्ही निर्देशांकांमध्ये १.४ टक्क्यांहून अधिक वाढ नोंदवली गेली.
सेन्सेक्सने सत्राची सुरुवात सुमारे १,२०० अंकांच्या म्हणजेच १.६ टक्क्यांच्या वाढीसह ७६,७२५.२७ वर केली, तर निफ्टीने जवळपास ३६० अंकांच्या म्हणजे १.५३ टक्क्यांच्या वाढीसह २३,९८४.८५ वर व्यवहार सुरू केला. सेन्सेक्स सकाळी १,०८९.९६ अंकांनी (१.४४ टक्के) वाढून ७६,६१७.९१ वर व्यवहार करत होता. दुसरीकडे, निफ्टी ५० हा ३४१.४५ अंकांनी (१.४५ टक्के) वाढून २३,९६४.३५ वर पोहोचला होता. विस्तृत बाजारातही सकारात्मक वातावरण दिसून आले. निफ्टी मिडकॅप निर्देशांकात १.४ टक्के, तर निफ्टी स्मॉलकॅप निर्देशांकात १.५ टक्क्यांची वाढ नोंदवली गेली.
क्षेत्रनिहाय पाहता, निफ्टी मेटल निर्देशांकात ३.६१ टक्के, निफ्टी रिअल्टीमध्ये २.३ टक्के, निफ्टी कन्झ्युमर ड्युरेबल्समध्ये २.३ टक्के आणि निफ्टी ऑटोमध्ये २.२ टक्के वाढ झाली. याशिवाय निफ्टी फायनान्शियल सर्व्हिसेस आणि निफ्टी ऑइल अँड गॅसमध्ये प्रत्येकी १.९ टक्के, तर निफ्टी पीएसयू बँकमध्ये १.४ टक्के वाढ झाली. मात्र, निफ्टी फार्मा आणि निफ्टी हेल्थकेअर निर्देशांकात घसरण नोंदवली गेली. निफ्टीमधील केवळ पाच समभाग वगळता इतर सर्व समभाग वाढीसह व्यवहार करत होते. श्रीराम फायनान्स, इंडिगो, इटरनल, टीएमपीव्ही, बजाज फिनसर्व्ह, बजाज फायनान्स आणि एल अँड टी यांच्या समभागांमध्ये सर्वाधिक वाढ दिसून आली.
अमेरिकेचे राष्ट्राध्यक्ष डोनाल्ड ट्रम्प यांनी वॉशिंग्टन आणि तेहरान यांच्यात शांतता करार झाल्याची घोषणा केली. या करारामुळे गेल्या चार महिन्यांपासून पश्चिम आशियात सुरू असलेल्या संघर्षाचा अंत होणार असल्याचे मानले जात आहे. या संघर्षात हजारो लोकांचा मृत्यू झाला असून जागतिक अर्थव्यवस्थेलाही मोठा फटका बसला होता. अहवालानुसार, अमेरिका आणि इराण या दोन्ही देशांनी सर्व आघाड्यांवरील लष्करी कारवाया तात्काळ थांबवण्याची घोषणा केली आहे.
तज्ज्ञांच्या मते, पश्चिम आशियातील तणाव कमी झाल्याने आणि कच्च्या तेलाच्या किंमतीत मोठी घसरण झाल्याने भारतीय अर्थव्यवस्था आणि शेअर बाजारासाठी सकारात्मक वातावरण निर्माण झाले आहे. पश्चिम आशियात शांततेची प्रक्रिया सुरू झाल्यामुळे आणि ब्रेंट क्रूडच्या किंमती ८४ डॉलरच्या खाली आल्यामुळे भारतीय अर्थव्यवस्था आणि शेअर बाजारासाठीची स्थिती अधिक अनुकूल झाली आहे.
हे ही वाचा:
पंतप्रधानांच्या स्लोव्हाकिया दौऱ्यात स्वागत मीठ-भाकरीने
प्रतीक्षा संपली! पहिलं विमान नोएडा विमानतळावर उतरलं
अमेरिका- इराण शांतता करार पूर्ण! होर्मुझ सामुद्रधुनी आता खुली
‘हेल्दी’ आणि ‘ऑर्गॅनिक’च्या नावाखाली ग्राहकांची दिशाभूल
कमोडिटी बाजारात, आंतरराष्ट्रीय मानांकित ब्रेंट क्रूडची किंमत जवळपास ५ टक्क्यांनी घसरून प्रति बॅरल ८३.०५ डॉलरवर आली. तर अमेरिकन वेस्ट टेक्सास इंटरमिजिएट (डब्ल्यूटीआय) क्रूडची किंमत ५.७४ टक्क्यांनी घसरून सुमारे ८० डॉलर प्रति बॅरलवर पोहोचली. अमेरिका-इराण शांतता करारामुळे ऊर्जा पुरवठ्यासाठी अत्यंत महत्त्वाची असलेली होर्मुझ सामुद्रधुनी खुली राहण्याची शक्यता निर्माण झाल्याने गुंतवणूकदारांचा आत्मविश्वास वाढला आहे.
