रस्त्याने चालतांना चुकून धक्का लागला आणि हातातील मोबाईल फोन पडल्यामुळे संतापलेल्या एकाने ३५ वर्षीय ऑफिस बॉयला चाकूने भोसकल्याची घटना गुरुवारी रात्री माहीम रेल्वे स्थानकाजवळ घडली.
या हल्ल्यात ऑफिस बॉय गंभीररीत्या जखमी झाला असून त्याच्यावर रुगणालयात उपचार सुरू आहे.माहीम पोलिसांनी या घटनेनंतर पळून गेलेल्या अनोळखी आरोपीविरुद्ध हत्येचा प्रयत्न केल्याप्रकरणी गुन्हा दाखल करण्यात आला आहे.पोलीस आरोपीच्या मागावर असून लवकरच आरोपीला अटक करण्यात येईल अशी माहिती पोलिसांनी दिली.
हे ही वाचा:
रिकाम्या पोटी लीची खाणे ठरू शकते धोकादायक? कारण घ्या जाणून
वरळी सी-लिंकवरून व्यापाऱ्याची आत्महत्या
राबडी देवी लवकरच खाली करणार १०, सर्क्युलर रोड येथील सरकारी बंगला
भारत-जपान संबंधांना गती; ताकाइची भारत दौऱ्यावर
पोलिसांनी दिलेल्या माहितीनुसार माहीम परिसरात राहणारा नवीन प्रसन्ना (३५) हा लोअरपरळ येथे एका खाजगी कार्यालयात ऑफिस बॉयचे काम करतो. गुरुवारी रात्री १० वाजण्याच्या सुमारास नवीन प्रसन्ना हा कार्यालयातुन घरी येण्यासाठी लोअर परळ येथून ट्रेनने माहीम रेल्वे स्थानकावर उतरला होता.
सेनापती बापट मार्ग येथून पायी जात असताना समोरून येणाऱ्या आरोपीला नवीन प्रसन्ना याचा चुकून धक्का लागला आणि आरोपीच्या हातातून मोबाईल निसटुन जमिनीवर पडला. नुकताच रिपेअर करून आणलेला मोबाईल पडल्यामुळे आरोपीने नवीन प्रसन्नाला शिवीगाळ करून खिशात असलेला चाकूने नवीन याच्यावर हल्ला केला.
दरम्यान नवीनच्या बचावासाठी आलेल्या इतर पादचारी आणि स्थानिकांना आरोपीने चाकूचा धाक दाखवून कोणी मध्ये आले तर त्यालाही सोडणार नाही असे धमकी देत तेथून पळ काढला.
हल्ल्यात गंभीर जखमी झालेल्या नवीनला नागरिकांनी तातडीने नजीकच्या रुगणालयात दाखल करून माहीम पोलीस ठाण्याला घटनेची माहिती दिली.
माहीम पोलिसांनी तात्काळ रुग्णालयात धाव घेऊन जखमी नवीन याचा जबाब नोंदवला. अनोळखी आरोपी विरुद्ध हत्येचा प्रयत्न केल्याप्रकरणी गुन्हा दाखल करण्यात आला आहे. माहीम पोलिसाकडून सीसीटीव्ही कॅमेराच्या फुटेज वरून आरोपीचा माग काढण्यात येत असून लवकरच त्याला अटक करण्यात येईल, अशी माहिती पोलिसांनी दिली आहे.
