भारताचे परराष्ट्र मंत्री एस जयशंकर हे सध्या ब्रिटनच्या दौऱ्यावर असून त्यांच्या लंडन भेटीत काही खलिस्तान्यांनी त्यांच्या ताफ्यासमोर निषेध व्यक्त केला. व्यत्यय आणण्याच्या प्रयत्नात खलिस्तान्यांनी हातात तिरंगा घेत एस जयशंकर यांच्या गाडीकडे धाव घेण्याचा प्रयत्न केला. यावेळी पोलिसांनी खलिस्तान्यांना रोखून बाजूला नेले. मात्र, या घटनेचा भारत सरकारने तीव्र निषेध व्यक्त करत प्रतिक्रिया दिली आहे.
लंडनमधील चॅथम हाऊस थिंक टँकमध्ये एका कार्यक्रमातून बाहेर पडताना खलिस्तानी अतिरेक्यांनी परराष्ट्रमंत्री एस जयशंकर यांच्या ताफ्याकडे धाव घेतली. या घटनेनंतर खळबळ उडाली असून परराष्ट्र मंत्रालयाने गुरुवारी एक निवेदन जारी केले. या घटनेला संबोधित करताना परराष्ट्र मंत्रालयाच्या प्रवक्त्याने म्हटले आहे की, “आम्ही परराष्ट्रमंत्री यांच्या ब्रिटन भेटीदरम्यान सुरक्षेचे उल्लंघन झाल्याचे फुटेज पाहिले आहे. फुटीरतावादी आणि अतिरेक्यांच्या या छोट्या गटाच्या चिथावणीखोर कारवायांचा आम्ही निषेध करतो. अशा घटकांकडून लोकशाही स्वातंत्र्याचा गैरवापर होत असल्याचा आम्हाला निषेध आहे. अशा प्रकरणांमध्ये यजमान सरकार त्यांच्या राजनैतिक दायित्वाचे पूर्णपणे पालन करेल अशी आम्हाला अपेक्षा आहे.” अशा कठोर शब्दात भारताने ब्रिटनला सुनावले आहे.
एस जयशंकर हे चर्चेनंतर चॅथम हाऊसच्या ठिकाणाहून बाहेर पडत असताना या परिसरात खलिस्तान्यांनी गर्दी केली होती. हातात तिरंगा घेऊन त्यांची घोषणाबाजी सुरू होती. एस जयशंकर हे त्यांच्या गाडीकडे येताच यातील एका खलिस्तान्याने त्यांच्या गाडीकडे धाव घेतली आणि भारतीय राष्ट्रध्वज फाडला. यानंतर तातडीने उपस्थित पोलिसांनी या व्यक्तीला बाजूला केले. या घटनेचा एक व्हिडिओ ऑनलाइन व्हायरल झाला आहे, ज्यामध्ये एक माणूस आक्रमकपणे मंत्र्यांच्या ताफ्याकडे धावत असल्याचे दिसून आले. इतरांकडून घोषणाबाजी केली जात असून तिरंगाही हातात दिसत आहे.
हे ही वाचा :
सैन्याच्या विमानातून नागरी वस्तीत चुकून झाला बॉम्बवर्षाव आणि…
महाराष्ट्राची भाषा मराठीच, राज्यातील प्रत्येकाने मराठी शिकले पाहिजे, बोलले पाहिजे!
जयकुमार गोरेंकडून संजय राऊत, रोहित पवारांविरोधात हक्कभंग
रान्या रावला सोने तस्करीसाठी मिळत होते १ किलोमागे १ लाख!
परराष्ट्र मंत्री एस जयशंकर यांच्या ४ ते ९ मार्च या कालावधीत ब्रिटनच्या अधिकृत दौऱ्यादरम्यान ही घटना घडली. तत्पूर्वी, जयशंकर यांनी चेव्हनिंग हाऊस येथे ब्रिटनचे परराष्ट्र सचिव डेव्हिड लॅमी यांच्यासोबत व्यापक चर्चा केली, ज्यामध्ये धोरणात्मक समन्वय, राजकीय सहकार्य, व्यापार वाटाघाटी, शिक्षण, तंत्रज्ञान, गतिशीलता आणि लोक-ते-लोक देवाणघेवाण यासह विविध द्विपक्षीय मुद्द्यांचा समावेश होता.
