पंतप्रधान नरेंद्र मोदी सोमवारी इंडोनेशिया, ऑस्ट्रेलिया आणि न्यूझीलंड या तीन देशांच्या दौऱ्यासाठी रवाना झाले. दरम्यान, पंतप्रधान मोदी यांचे जकार्ता येथे अत्यंत भव्य आणि विशेष स्वागत करण्यात आले. इंडोनेशियाच्या हवाई हद्दीत प्रवेश करताच तेथील हवाई दलाच्या लढाऊ विमानांनी पंतप्रधान मोदी यांच्या विशेष विमानाला एस्कॉर्ट करत सन्मान दिला. त्यानंतर जकार्ता विमानतळावर इंडोनेशियाचे राष्ट्राध्यक्ष प्रबोवो सुबियांतो स्वतः उपस्थित राहून त्यांचे स्वागत केले. दोन्ही देशांतील वाढत्या सामरिक आणि द्विपक्षीय संबंधांचे हे प्रतीक मानले जात आहे.
पंतप्रधान मोदी ६ ते ८ जुलै या कालावधीत इंडोनेशियाच्या दौऱ्यावर असून, राष्ट्राध्यक्ष प्रबोवो सुबियांतो यांच्या निमंत्रणावर हा अधिकृत दौरा होत आहे. भारत आणि इंडोनेशियामधील सर्वसमावेशक सामरिक भागीदारी अधिक बळकट करणे, तसेच संरक्षण, व्यापार, गुंतवणूक, सागरी सुरक्षा, डिजिटल तंत्रज्ञान, आरोग्य, ऊर्जा आणि कनेक्टिव्हिटीसह विविध क्षेत्रांतील सहकार्याचा आढावा घेणे हा या दौऱ्याचा मुख्य उद्देश आहे.
जकार्ता विमानतळावर पोहोचल्यानंतर पंतप्रधान मोदी यांचे पारंपरिक सांस्कृतिक कार्यक्रमाद्वारे स्वागत करण्यात आले. विमानतळावर दोन्ही देशांचे वरिष्ठ अधिकारी, राजनैतिक प्रतिनिधी आणि भारतीय समुदायातील सदस्य मोठ्या संख्येने उपस्थित होते. इंडोनेशियाच्या राष्ट्राध्यक्षांनी स्वतः विमानतळावर जाऊन केलेले स्वागत हे विशेष राजनैतिक महत्त्वाचे मानले जात असून, भारताशी असलेल्या मैत्रीपूर्ण संबंधांबाबतचा सकारात्मक संदेश म्हणून त्याकडे पाहिले जात आहे.
या दौऱ्यात पंतप्रधान मोदी आणि राष्ट्राध्यक्ष प्रबोवो सुबियांतो यांच्यात द्विपक्षीय शिष्टमंडळस्तरीय चर्चा होणार आहे. या चर्चेत संरक्षण सहकार्य, सागरी सुरक्षेतील समन्वय, इंडो-पॅसिफिक क्षेत्रातील सहकार्य, व्यापारवाढ, पायाभूत सुविधा, हरित ऊर्जा आणि तंत्रज्ञान क्षेत्रातील भागीदारीवर विशेष भर दिला जाणार आहे. तसेच दोन्ही देशांदरम्यान विविध करारांवर स्वाक्षऱ्या होण्याचीही शक्यता आहे.
हे ही वाचा:
लोणावळ्यात पर्यटकांवर निर्बंध! ३१ जुलैपर्यंत कलम १६३ लागू
आरजी कर प्रकरणी तीन आयपीएस अधिकाऱ्यांचे निलंबन कायम
कच्च्या तेलाच्या दरघसरणीने भारताला आर्थिक बूस्टर
८० वर्षांनंतर न्याय! ९,९०९ हुतात्मा सैनिकांची नावे अधिकृत यादीत
पंतप्रधान मोदी जकार्ता येथे भारतीय वंशाच्या नागरिकांनाही संबोधित करणार आहेत. याशिवाय ते इंडोनेशियातील जागतिक वारसा स्थळ असलेल्या प्रांबानन मंदिराला भेट देणार असून, भारत आणि इंडोनेशियामधील हजारो वर्षांच्या सांस्कृतिक आणि सभ्यतागत संबंधांना अधोरेखित करणार आहेत.
गेल्या काही वर्षांत भारत आणि इंडोनेशियामधील संबंध अधिक दृढ झाले आहेत. विशेषतः संरक्षण, सागरी सुरक्षा, व्यापार, गुंतवणूक, आरोग्य, कृषी, डिजिटल अर्थव्यवस्था आणि हरित ऊर्जेसारख्या क्षेत्रांत दोन्ही देशांमध्ये सहकार्य वाढले आहे. त्यामुळे पंतप्रधान मोदी यांचा हा दौरा द्विपक्षीय संबंधांना नवी दिशा देणारा आणि इंडो-पॅसिफिक क्षेत्रातील भारताच्या धोरणात्मक भूमिकेला अधिक बळकटी देणारा मानला जात आहे.
