‘परिबोर्तन’ची नवी पहाट! बंगालच्या हवेत बदलाची झुळूक

पश्चिम बंगालमध्ये भाजपच्या विजयांनंतर प्रथमच राज्याच्या दौऱ्यावर आलेल्या पंतप्रधान नरेंद्र मोदी यांनी बंगालमध्ये परिवर्तनाचे नवे पर्व सुरू झाल्याचा दावा केला. पश्चिम बंग दिनाच्या कार्यक्रमात बोलताना त्यांनी, “आज बंगालच्या हवेत नव्या ताजेपणाची जाणीव होत आहे. ‘परिबोर्तन’मुळे जनतेच्या मनात नवा उत्साह, नवा आत्मविश्वास आणि विकासाची नवी आशा निर्माण झाली आहे,” असे सांगत राज्यातील राजकीय बदलाचे स्वागत केले.

पंतप्रधान मोदी म्हणाले की, बंगालच्या जनतेने विकास, सुशासन आणि स्थिरतेच्या बाजूने कौल दिला आहे. अनेक वर्षांनंतर राज्यातील नागरिकांना परिवर्तनाची नवी संधी मिळाली असून आता बंगालला विकासाच्या नव्या उंचीवर नेण्याची वेळ आली आहे. जनतेने दाखवलेल्या विश्वासाचे रूपांतर प्रत्यक्ष विकासकामांमध्ये करण्यासाठी केंद्र आणि राज्य सरकार एकत्रितपणे काम करणार असल्याचे त्यांनी स्पष्ट केले.
हे ही वाचा:
नेमार पुनरागमनासाठी सज्ज; ब्राझीलला मोठा दिलासा

दुसऱ्या दिवशीही बेस्ट चर्चा निष्फळ

आपल्या भाषणात मोदी यांनी बंगालच्या सांस्कृतिक आणि ऐतिहासिक वारशाचा गौरव करताना स्वातंत्र्यलढ्यातील राज्याच्या योगदानाची आठवण करून दिली. देशाला दिशा देणाऱ्या अनेक महान व्यक्तिमत्त्वांची भूमी असलेल्या बंगालला पुन्हा एकदा देशाच्या प्रगतीचे केंद्र बनवण्याचा निर्धार त्यांनी व्यक्त केला. राजकीय बदल हा सूडाचे नव्हे तर विकासाचे साधन असला पाहिजे, असे सांगत त्यांनी “बदल हवा, पण बदल्याचे राजकारण नको,” असा संदेश दिला.

मोदी यांनी राज्यातील युवक, शेतकरी, महिला आणि उद्योजक यांच्या अपेक्षा पूर्ण करण्यासाठी सरकार कटिबद्ध असल्याचे सांगितले. उद्योग, गुंतवणूक, रोजगारनिर्मिती आणि आधुनिक पायाभूत सुविधांवर विशेष भर दिला जाईल, असेही त्यांनी नमूद केले. बंगालमध्ये मोठ्या प्रमाणात गुंतवणूक आकर्षित करून रोजगाराच्या नव्या संधी निर्माण करण्यासाठी सरकार प्रयत्नशील राहील, असे आश्वासन त्यांनी दिले.

यावेळी पंतप्रधानांनी सुमारे १८ हजार ८८० कोटी रुपयांच्या विविध विकास प्रकल्पांचे उद्घाटन, लोकार्पण आणि भूमिपूजन केले. या प्रकल्पांमुळे राज्यातील संपर्क व्यवस्था, वाहतूक सुविधा, पायाभूत विकास आणि आर्थिक वाढीला मोठी चालना मिळेल, असा विश्वास त्यांनी व्यक्त केला. बंगालचा विकास हा केवळ राज्यापुरता मर्यादित नसून तो संपूर्ण देशाच्या प्रगतीशी जोडलेला आहे, असे सांगत त्यांनी राज्याला देशातील अग्रगण्य प्रदेशांमध्ये स्थान मिळवून देण्यासाठी सर्वतोपरी प्रयत्न केले जातील, असे आश्वासन दिले.

राजकीय परिवर्तनानंतर बंगालमध्ये आशावादाचे नवे वातावरण निर्माण झाले असून जनतेच्या आकांक्षा पूर्ण करण्यासाठी भाजप सरकार वेगाने काम करेल, असा विश्वास व्यक्त करत मोदी यांनी आपल्या भाषणाचा समारोप केला. त्यांच्या या दौऱ्याकडे बंगालच्या नव्या राजकीय अध्यायाची सुरुवात म्हणून पाहिले जात आहे.