नार्वेकरांनी शोकप्रस्तावाच्या कागदातून भेळ खाल्ली होती का?

विधानसभेतील आशा भोसले यांच्या शोकप्रस्तावाच्या वाचनादरम्यान झालेल्या चुकांवरून मनसे अध्यक्ष राज ठाकरे यांनी विधानसभा अध्यक्ष राहुल नार्वेकर यांच्यावर जोरदार टीका केली आहे. आशा भोसले यांच्यासारख्या जागतिक कीर्तीच्या गायिकेला श्रद्धांजली वाहताना झालेल्या उच्चारांच्या आणि नावांच्या चुकांमुळे राज ठाकरे संतप्त झाले असून त्यांनी या घटनेला मराठी भाषेचा अवमान असल्याचे म्हटले आहे.

पावसाळी अधिवेशनात आशा भोसले यांच्या निधनानंतर शोकप्रस्ताव मांडण्यात आला होता. हा प्रस्ताव वाचताना राहुल नार्वेकर यांनी अनेक ठिकाणी अडखळत वाचन केले. याचवेळी आशाताईंचे वडील, ज्येष्ठ गायक आणि नाटककार पंडित दीनानाथ मंगेशकर यांचा उल्लेख करताना त्यांनी चुकून ‘दीनदयाळ मंगेशकर’ असा उल्लेख केल्याचे समोर आले. या चुकीचा व्हिडिओ सोशल मीडियावर व्हायरल झाल्यानंतर राजकीय वर्तुळात मोठी चर्चा रंगली.
हे ही वाचा:
भारत-चीन संबंधांमध्ये मूलभूत हितांचा आदर आवश्यक

फिरहाद हकीम, अरूप बिस्वास यांच्यासह आठ नेत्यांची तृणमूलमधून हकालपट्टी

या पार्श्वभूमीवर राज ठाकरे यांनी अत्यंत तीव्र शब्दांत नाराजी व्यक्त केली. समोर लिहून दिलेला मजकूरसुद्धा नीट वाचता येत नसेल तर ते दुर्दैवी असल्याचे त्यांनी म्हटले. “शोकप्रस्ताव वाचण्यापूर्वी त्या कागदातून भेळ खाल्ली होती का?” असा उपरोधिक सवाल करत त्यांनी राहुल नार्वेकर यांच्यावर निशाणा साधला. एवढ्या महत्त्वाच्या प्रसंगी आणि महाराष्ट्राच्या सांस्कृतिक परंपरेशी निगडित असलेल्या व्यक्तीबद्दल बोलताना अशी चूक होणे अक्षम्य असल्याचेही त्यांनी स्पष्ट केले.

राज ठाकरे यांनी केवळ राहुल नार्वेकर यांच्यावरच नाही, तर सभागृहातील इतर सदस्यांवरही प्रश्नचिन्ह उपस्थित केले. मुख्यमंत्री देवेंद्र फडणवीस, उपमुख्यमंत्री एकनाथ शिंदे तसेच इतर वरिष्ठ आमदार उपस्थित असताना कोणीही ही चूक दुरुस्त केली नाही, याबद्दल त्यांनी आश्चर्य व्यक्त केले. महाराष्ट्राच्या विधानसभेत मराठी भाषेचा आणि महाराष्ट्राच्या सांस्कृतिक वारशाचा असा अवमान होत असताना कोणीही हस्तक्षेप केला नाही, ही बाब अधिक गंभीर असल्याचे त्यांनी म्हटले.

मराठी भाषा, संस्कृती आणि महाराष्ट्राच्या अस्मितेचा मुद्दा उपस्थित करत राज ठाकरे यांनी सार्वजनिक पदांवर असलेल्या व्यक्तींनी भाषेबाबत अधिक जबाबदारीने वागण्याची गरज असल्याचे सांगितले. ज्यांना समोरचा मराठी मजकूर नीट वाचता येत नाही, ते मराठीच्या प्रश्नांवर काय भूमिका घेणार, असा सवालही त्यांनी उपस्थित केला.

दरम्यान, आशा भोसले यांच्या शोकप्रस्तावाच्या वाचनादरम्यान झालेल्या या चुकीमुळे राजकीय वातावरण तापले असून सोशल मीडियावरही विविध प्रतिक्रिया उमटत आहेत. एका साध्या चुकीपलीकडे जाऊन हा विषय आता मराठी भाषेचा सन्मान, विधिमंडळातील जबाबदारी आणि सार्वजनिक जीवनातील संवेदनशीलतेचा मुद्दा बनला आहे. त्यामुळे राहुल नार्वेकर यांच्या या चुकांवरून सुरू झालेला वाद आगामी काळात आणखी रंगण्याची शक्यता व्यक्त केली जात आहे.