बंगालमध्ये मुख्यमंत्री सुवेंदू अधिकारी यांनी इस्कॉन मंदिरात केली गौपूजा

पश्चिम बंगालचे मुख्यमंत्री सुवेंदू अधिकारी यांनी गुरुवारी नदिया जिल्ह्यातील मायापूर येथील इस्कॉन मुख्यालयाला भेट देत पारंपरिक पद्धतीने गौपूजा केली. मुख्यमंत्री झाल्यानंतरची त्यांची ही पहिली मायापूर भेट असल्याने या दौऱ्याकडे धार्मिक श्रद्धा आणि राजकीय रणनीती या दोन्ही दृष्टीने मोठ्या उत्सुकतेने पाहिले जात आहे. सकाळपासूनच मायापूर परिसरात भक्तांची मोठी गर्दी झाली होती. कीर्तनाच्या गजरात आणि “हरे कृष्ण”च्या घोषणांमध्ये सुवेंदू अधिकारी मंदिरात दाखल झाले तेव्हा संपूर्ण परिसर भक्तिमय वातावरणाने भारावून गेला होता.

पारंपरिक पांढरे धोतर आणि कुर्ता परिधान केलेले सुवेंदू अधिकारी अनवाणी पायाने मंदिराच्या गोशाळेत पोहोचले. त्यांनी गायींची विधिवत पूजा केली, त्यांना फळे आणि मिठाई खाऊ घातली तसेच गोसेवेच्या विविध धार्मिक विधींमध्येही सहभाग घेतला. मंदिरातील साधू-संतांसोबत संवाद साधताना त्यांनी भारतीय संस्कृतीत गायीचे असलेले महत्त्व अधोरेखित केले. इस्कॉनच्या पदाधिकाऱ्यांनीही मुख्यमंत्री यांच्या भेटीचे स्वागत करत समाजात अध्यात्म, सेवा आणि संस्कृती यांचा संदेश पोहोचवण्यासाठी अशा भेटी महत्त्वाच्या असल्याचे सांगितले.
हे ही वाचा:
छत्रपती संभाजीनगरमध्ये जीन्सी परिसरातून १३१ गोवंश जप्त

खंडणी, मारहाणीच्या आरोपांनंतर जहांगीर खानच्या निकटवर्तीय नेत्याला अटक

मुख्यमंत्री यांच्या भेटीदरम्यान मंदिर परिसरात कडक सुरक्षा व्यवस्था ठेवण्यात आली होती. पोलिसांचा मोठा बंदोबस्त तैनात करण्यात आला होता. मंदिर परिसरात आलेल्या भाविकांनी सुवेंदू अधिकारी यांचे स्वागत करत त्यांच्या समर्थनार्थ घोषणाबाजीही केली. या दौऱ्यामुळे मायापूरमध्ये उत्साहाचे वातावरण निर्माण झाले होते. अलीकडेच सुवेंदू अधिकारी यांनी बेलूर मठालाही भेट देत स्वामी विवेकानंद यांच्या विचारांचा उल्लेख केला होता. अध्यात्म, राष्ट्रवाद आणि संस्कृती या मुद्द्यांवर त्यांनी सातत्याने भूमिका मांडल्याने त्यांच्या सलग धार्मिक भेटींमागे व्यापक राजकीय रणनीती असल्याची चर्चा सुरू आहे.

मायापूर येथील इस्कॉन मुख्यालय हे जगभरातील कृष्णभक्तांसाठी अत्यंत महत्त्वाचे धार्मिक केंद्र मानले जाते. दरवर्षी लाखो भाविक येथे दर्शनासाठी येतात. अशा परिस्थितीत मुख्यमंत्री सुवेंदू अधिकारी यांच्या भेटीमुळे पुन्हा एकदा पश्चिम बंगालमध्ये धर्म, संस्कृती आणि राजकारण यांचा संगम चर्चेचा केंद्रबिंदू ठरला आहे.