अमेरिकेतील फुलर्टन येथे सुरू असलेल्या बीडब्ल्यूएफ यूएस ओपन सुपर ३०० बॅडमिंटन स्पर्धेत भारताचा युवा शटलर रौनक चौहान याने दमदार कामगिरी करत कारकिर्दीतील सर्वात मोठे यश संपादन केले आहे. अवघ्या १८ वर्षीय रौनकने उपांत्यपूर्व फेरीत अनुभवी इस्रायली खेळाडू मिशा झिल्बरमनचा २३-२१, २१-११ अशा सरळ गेममध्ये पराभव करत प्रथमच बीडब्ल्यूएफ वर्ल्ड टूर सुपर ३०० स्पर्धेच्या उपांत्य फेरीत प्रवेश केला. या विजयामुळे आंतरराष्ट्रीय बॅडमिंटनमध्ये रौनकचे नाव अधिक ठळकपणे समोर आले असून भारतीय बॅडमिंटनला आणखी एक आशादायी स्टार मिळाल्याची चर्चा रंगू लागली आहे.
सामन्याच्या सुरुवातीपासूनच दोन्ही खेळाडूंमध्ये चुरशीची लढत पाहायला मिळाली. पहिल्या गेममध्ये प्रत्येक गुणासाठी दोघांनीही जोरदार संघर्ष केला. मात्र निर्णायक क्षणी संयम आणि अचूक फटकेबाजीच्या जोरावर रौनकने २३-२१ असा गेम जिंकत सामन्यावर पकड मिळवली. पहिला गेम जिंकल्यानंतर त्याचा आत्मविश्वास अधिकच उंचावला आणि दुसऱ्या गेममध्ये त्याने पूर्ण वर्चस्व गाजवत झिल्बरमनला कोणतीही संधी दिली नाही. आक्रमक खेळ, वेगवान हालचाली आणि अचूक स्मॅशच्या जोरावर रौनकने दुसरा गेम २१-११ असा सहज जिंकला आणि अवघ्या ३८ मिनिटांत सामना आपल्या नावावर केला.
हे ही वाचा:
टीईटी पेपरफुटी प्रकरणी तिघे ताब्यात
भायखळ्यात मोहरमच्या जुलूसमध्ये वाटल्या विषारी कॅप्सूलचे; एक गंभीर
भारत-बांगलादेश सीमेवर तणाव; BSF-BGB आमनेसामने
उद्धव ठाकरेंनी दिलेली चांदीची वीट गायब नाही…ती सुरक्षितच!
या स्पर्धेत रौनकचा प्रवास अत्यंत प्रभावी ठरला आहे. याआधीच्या फेऱ्यांमध्येही त्याने उच्च क्रमांकाच्या खेळाडूंना पराभूत करत मोठे उलटफेर घडवून आणले होते. त्यामुळे त्याचा आत्मविश्वास शिगेला पोहोचला असून आता उपांत्य फेरीत त्याच्यासमोर चायनीज तैपेईचा आठव्या मानांकित सु ली यांगचे आव्हान असणार आहे. हा सामना जिंकण्यात रौनकला यश आले, तर तो आपल्या कारकिर्दीतील पहिल्याच सुपर ३०० स्पर्धेच्या अंतिम फेरीत प्रवेश करेल.
भारतासाठी आणखी एक आनंदाची बाब म्हणजे अनुभवी शटलर किदांबी श्रीकांत यानेही उपांत्य फेरी गाठली आहे. त्यामुळे दोन्ही भारतीय खेळाडू आपापले सामने जिंकले, तर यूएस ओपनच्या अंतिम फेरीत अखिल भारतीय लढत रंगण्याची शक्यता आहे. भारतीय बॅडमिंटनच्या नव्या पिढीचा आत्मविश्वास आणि क्षमता जगासमोर मांडणारी रौनक चौहानची ही कामगिरी भविष्यासाठी अत्यंत आशादायी मानली जात आहे. सातत्य, मेहनत आणि निर्भय खेळाच्या जोरावर रौनक आता भारताचा पुढील मोठा बॅडमिंटन स्टार म्हणून उदयास येत असल्याचे या स्पर्धेने पुन्हा एकदा सिद्ध केले आहे.
