आयपीएल २०२५ मध्ये लखनऊ सुपर जायंट्सकडून खेळणाऱ्या ऋषभ पंतने हंगामाच्या अखेरच्या सामन्यात तुफानी शतकी खेळी साकारली. मात्र त्यांच्या ६१ चेंडूंमध्ये नाबाद ११८ धावांची कामगिरी असूनही, संघाला विजय मिळविता आला नाही. आरसीबीने २२८ धावांचे लक्ष्य सहज गाठत लखनऊचा हंगाम पराभवाने संपवला.
या पराभवानंतर लखनऊचे मेंटर जहीर खान यांनी पंतच्या कामगिरीचे कौतुक करताना सांगितले, “ऋषभने संपूर्ण हंगामात फारशा मोठ्या खेळी केल्या नाहीत, मात्र शेवटच्या सामन्यात त्याने जी ताकद दाखवली, तीच त्याची खरी क्षमता आहे.”
पंतचे आयपीएलमधील हे दुसरे शतक ठरले. मात्र हंगामभर त्याचे फलंदाजीतील प्रदर्शन साधारणच होते. त्याने १३३.१६ च्या स्ट्राइक रेटने केवळ २६९ धावा केल्या. तरीही जहीर खान यांनी ऋषभच्या नेतृत्वगुणांची प्रशंसा केली. “लीडर म्हणून ऋषभने उत्तम कामगिरी केली. फलंदाजीतून खूप काही शिकण्यासारखं होतं, आणि हा संपूर्ण हंगाम त्याच्यासाठी एक शैक्षणिक अनुभव ठरला,” असे ते म्हणाले.
लखनऊ सुपर जायंट्सने या हंगामात १४ पैकी फक्त ६ सामने जिंकले आणि गुणतालिकेत सातव्या स्थानावर आपला हंगाम संपवला. मागील सहा सामन्यांपैकी केवळ एकच सामना त्यांनी जिंकला होता. संघाला गोलंदाजीच्या आघाडीवर सतत अडचणींना सामोरे जावे लागले, हे जहीर खान यांनीही मान्य केले.
“मुख्य गोलंदाजांच्या दुखापतीमुळे योग्य बॉलिंग कॉम्बिनेशन आम्हाला मिळाले नाही. तरीही संघातील सर्व खेळाडूंनी एकत्रितपणे प्रयत्न केले, ही गोष्ट खूप सकारात्मक आहे,” असे त्यांनी स्पष्ट केले.
हंगामाच्या अपयशाकडे सकारात्मक दृष्टिकोनातून पाहत जहीर खान म्हणाले, “हा शेवट असला तरी लखनऊ संघाच्या प्रवासाची ही खरी सुरुवात आहे. आमच्याकडे भक्कम पाया आहे, आणि आम्ही पुढील हंगामासाठी नव्याने तयारी करू.”
