बेंगळुरूत सरळ रस्त्यावर नागमोडी ‘स्पीडब्रेकर’मुळे रहदारी थांबली

बेंगळुरूमधील पॅलेस रोडवर काल सायंकाळी वाहतुकीला एका अनपेक्षित “व्हीआयपी पाहुण्यामुळे” अडथळा निर्माण झाला. रस्त्याच्या मध्यभागी फणा काढून बसलेल्या नागामुळे काही काळ वाहनांची रांग लागली.

पॅलेस रोडवर पूर्ण फणा काढून बसलेला नाग पाहून वाहनचालक आणि स्थानिक नागरिक घाबरले. हा नाग जवळपास ३० ते ४० मिनिटे रस्त्यावरच थांबला होता. त्यामुळे वाहतुकीवर सौम्य परिणाम झाला आणि परिस्थिती नियंत्रणात येईपर्यंत प्रवाशांना थांबावे लागले. ही अनोखी घटना कॅमेऱ्यात कैद झाली आणि सोशल मीडियावर काही वेळातच व्हायरल झाली. हा व्हिडिओ शेअर करत एका वापरकर्त्याने लिहिले, “काल बेंगळुरूच्या वाहतुकीला नवा व्हीआयपी भेटला. पॅलेस रोडवर एक नाग.”

घटनेचे वर्णन करताना त्याने पुढे लिहिले, “बहुतेक या नागाने रस्त्याच्या मधोमध ३० मिनिटे संध्याकाळचे ध्यान करण्यासाठी योग्य जागा निवडली होती. पूर्ण फणा काढून तो बसला होता आणि वाहतुकीच्या नियमांची त्याला अजिबात पर्वा नव्हती.”

Bengaluru traffic met its newest VIP yesterday

A Cobra on Palace Road.

Seems like the snake decided the middle of the road was the perfect spot for a 30-minute evening meditation session, complete with hood fully open and zero concern for traffic rules.

Police finally… pic.twitter.com/4EgatP2Lnz

— Nagarjun Dwarakanath (@nagarjund) July 8, 2026

नागाच्या या अनपेक्षित उपस्थितीमुळे नेहमीचा प्रवास थरारक बनला. नाग रस्त्यावर ठामपणे बसून राहिल्याने वाहनांना वेग कमी करावा लागला. सोशल मीडियावर अनेकांनी यावर विनोदी प्रतिक्रिया देत, “बेंगळुरूला आता वेगळाच ट्रॅफिक कंट्रोलर मिळाला आहे,” अशी टिप्पणी केली.

हे ही वाचा:

दक्षिण कोरियाच्या शेअर बाजारात मोठा भूकंप

“७०-८० वर्षांत डॉ. श्यामा प्रसाद मुखर्जींचा इतिहास पुसण्याचा प्रयत्न”

भारत-इंडोनेशिया व्यापार आता स्थानिक चलनात

नेहरू नगरमध्ये लिफ्टच्या उघड्या शाफ्टमध्ये पडून १२ वर्षीय मुलाचा मृत्यू

पोस्टमध्ये पुढे विनोदी शैलीत म्हटले आहे, “शेवटी पोलीस घटनास्थळी पोहोचले आणि या अनपेक्षित अडथळ्याला सुरक्षितपणे दुसरीकडे हलवले. बीएमडब्ल्यू नसतानाही वाहतूक कोंडी निर्माण करणारा नाग फक्त बेंगळुरूतच पाहायला मिळू शकतो.”

घटनास्थळी पोहोचलेल्या पोलिसांनी नागाला सुरक्षितपणे पकडून जंगलात सोडले. त्यामुळे नाग आणि प्रवासी दोघेही सुरक्षित राहिले. त्यानंतर वाहतूक पुन्हा सुरळीत सुरू झाली. ही घटना पुन्हा एकदा अधोरेखित करते की, विशेषतः हवामानातील बदलाच्या काळात शहरी भाग आणि वन्यजीवांचे अधिवास यांच्यातील सीमारेषा अनेकदा एकमेकांमध्ये मिसळतात. त्यामुळे सापांसारखे वन्य प्राणी मानवी वस्त्यांमध्ये दिसून येण्याच्या घटना घडतात.

बेंगळुरूकरांसाठी मात्र हा एक असा ट्रॅफिक जॅम ठरला, ज्यामध्ये ना हॉर्नचा गोंगाट होता, ना वाहनचालकांमध्ये वाद. रस्त्याच्या मध्यभागी शांतपणे बसलेल्या एका नागानेच काही काळ संपूर्ण वाहतुकीवर ताबा मिळवला होता.