भारतीय सलामीवीर शुभमन गिल दुबईत होणाऱ्या न्यूझिलंडविरुद्धच्या फायनलसाठी सज्ज झाला आहे. गिल रविवारी आपला दुसरा आयसीसी टूर्नामेंट अंतिम सामना खेळणार आहे. रोहित शर्माच्या नेतृत्वाखालील भारतीय संघ सज्ज झाला आहे.
अहमदाबादमध्ये झालेल्या आयसीसी २०२३ वनडे विश्वचषकाच्या अंतिम सामन्यात गिल मोठी खेळी करू शकला नव्हता आणि अवघ्या चार धावांवर तंबूत परतला. त्यानंतर भारत सहा विकेट्सनी पराभूत झाला आणि तिसऱ्या विश्वचषक विजेतेपदापासून दूर राहिला.
मात्र, गिल त्या अपयश मागे झटकून आता अधिक परिपक्व झाला आहे. वनडे फलंदाजी क्रमवारीत अव्वल स्थानी असलेला भारतीय संघाचा उपकर्णधार मानसिकदृष्ट्या दबाव अधिक चांगल्या प्रकारे हाताळण्यासाठी आणि क्रीजवर अधिक वेळ टिकून राहण्यासाठी सज्ज आहे.
रविवारी न्यूझीलंडविरुद्ध भारताच्या निर्णायक सामन्यापूर्वी आयसीसीने गिलच्या हवाल्याने म्हटले, “त्या सामन्यात थोडी घाई झाली होती.”
हेही वाचा :
चॅम्पियन्स ट्रॉफी : न्यूझीलंडची पाकिस्तानमध्ये धमाल, दुबईत मात्र बेहाल
फेब्रुवारीत २२० कोटींहून अधिक आधार ऑथेंटिकेशन व्यवहार
बुद्धिबळ ग्रँडमास्टर वैशालीकडे पंतप्रधानांच्या ‘एक्स’ हँडलची जबाबदारी
गिल म्हणाला, “मी अनेक गोष्टी शिकल्या. तो माझा पहिलाच आयसीसी अंतिम सामना होता. मी खूप उत्सुक होतो. त्या सामन्यात मला असं वाटत होतं की मी स्वतःला वेळ देण्याऐवजी हावी होण्याचा प्रयत्न करत होतो. मला वाटतं की मोठ्या आयसीसी नॉकआउट सामन्यांमध्ये तुम्ही जितका विचार करता, त्यापेक्षा स्वतःला थोडा अधिक वेळ द्यायला हवा.”
२५ वर्षीय गिलने हे भारतासाठी चांगली संधी असल्याचे म्हटले, कारण ‘मेन इन ब्लू’ दोन वर्षांच्या कालावधीत सलग चौथ्या आयसीसी अंतिम सामन्यात खेळणार आहे. भारताने याआधी जागतिक कसोटी अजिंक्यपद स्पर्धा, २०२३ वनडे विश्वचषक आणि २०२४ टी२० विश्वचषकाच्या अंतिम लढती खेळल्या. रोहितच्या नेतृत्वाखाली हा चौथा अंतिम सामना असणार आहे.
गिल म्हणाला, “आम्ही २०२३ मध्ये (वनडे विश्वचषक अंतिम) हरलो आणि त्यानंतर २०२४ मध्ये टी२० विश्वचषक जिंकला. त्यामुळे मला वाटते की, या स्पर्धेत आमचा संघ फॉर्मात आहे. हा आमच्यासाठी एक रोमांचक सामना असेल आणि जर आम्ही तो जिंकू शकलो, तर या वर्षातील या फॉरमॅटचा शेवट करण्याचा तो एक परिपूर्ण मार्ग ठरेल.”
त्याने पुढे म्हटले, “हा आमच्यासाठी मोठा संधी आहे. कोणत्याही आयसीसी स्पर्धेत किंवा इव्हेंटमध्ये आमच्यावर मोठी जबाबदारी असते. आमच्या चाहत्यांकडून खूप अपेक्षा असतात. गेल्या दोन आयसीसी स्पर्धांमध्ये आम्ही अंतिम फेरीपर्यंत पोहोचलो आहोत.”
