पंतप्रधान नरेंद्र मोदी पाच देशांच्या दौऱ्यानंतर भारतात परतले असून या दौऱ्यात त्यांनी स्वीडनसह चार युरोपीय देशांना भेट दिली. स्वीडनमध्ये पंतप्रधान मोदी यांनी तेथील पंतप्रधान उल्फ क्रिस्टर्सन आणि क्राउन प्रिन्सेस यांना भारताची अध्यात्मिक, सांस्कृतिक आणि कलात्मक परंपरा दर्शवणाऱ्या विशेष भेटवस्तू दिल्या. पंतप्रधान मोदी यांनी स्वीडनचे पंतप्रधान उल्फ क्रिस्टर्सन यांना रवींद्रनाथ टागोर यांच्या विचारविश्वाचे दर्शन घडवणारे ‘वर्ड्स ऑफ मास्टर’ हे पुस्तक भेट दिले. टागोर हे विसाव्या शतकातील प्रभावशाली साहित्यिक आणि तत्त्वज्ञ मानले जातात. १९१३ मध्ये त्यांना ‘गीतांजली’ या काव्यसंग्रहासाठी साहित्यातील नोबेल पुरस्कार मिळाला होता.
बंगालच्या सांस्कृतिक परंपरांशी घट्ट नाते असलेल्या टागोर यांच्या विचारांमध्ये स्वातंत्र्य, करुणा, निसर्ग आणि मानवतेचा संदेश आढळतो. नोबेल परंपरा आणि स्वीडन भेटींमुळे त्यांचे स्वीडनशीही विशेष बौद्धिक नाते निर्माण झाले होते. याशिवाय, पंतप्रधान मोदी यांनी पश्चिम बंगालच्या मातीत रुजलेल्या हस्तनिर्मित शांतिनिकेतन मेसेंजर बॅगचीही भेट दिली. शांतिनिकेतनची लेदर कला ही जीआय मानांकन प्राप्त हस्तकला असून बीरभूम जिल्ह्यातील शेकडो कारागिरांच्या उपजीविकेचा आधार आहे. ही बॅग टागोर यांच्या कलात्मक दृष्टिकोनाला आधुनिक फॅशनशी जोडणारा दुवा मानली जाते.
पंतप्रधान मोदी यांनी मणिपूरमधील प्रसिद्ध ‘लोकटक टी’ देखील क्रिस्टर्सन यांना भेट म्हणून दिली. लोकटक हे ईशान्य भारतातील सर्वात मोठे गोड्या पाण्याचे सरोवर आहे. लोकटक सरोवराच्या परिसरातील डोंगराळ भागात पिकणारी ही विशेष चहा रसायनमुक्त पद्धतीने तयार केली जाते. धुक्याने व्यापलेल्या वातावरणामुळे या चहाला वेगळी चव आणि शुद्धता लाभते.
स्वीडिश पंतप्रधानांनी विमानतळावर पंतप्रधान मोदी यांचे उबदार स्वागत केले होते. त्याच आत्मीयतेचा प्रत्यय भारताकडून देण्यात आलेल्या भेटीतही दिसून आला. मोदी यांनी त्यांना लडाखमधील शुद्ध लोकरीपासून विणलेला पश्मिना स्टोल भेट दिला. हा स्टोल हिमालयीन संस्कृतीचे प्रतीक मानला जातो. चांगथांग पठारातील चांगथांगी शेळ्यांच्या मऊ लोकरीपासून तो तयार केला जातो. स्थानिक महिला पारंपरिक पद्धतीने ही लोकर काततात आणि हातमागावर त्याचे विणकाम करतात. नैसर्गिक रंग आणि स्थानिक उत्पादनामुळे ही कला पूर्णपणे शाश्वत आणि पारंपरिक मानली जाते.
हे ही वाचा
पंतप्रधान मोदींकडून मेलोनींना ‘शिरुई लिली सिल्क स्टोल’ची भेट
महेश्वरी सिल्क ते मेघालयातील अननस; पंतप्रधान मोदींकडून युएई नेतृत्वाला खास भेट
रहमान गल्ली आता राम गल्ली; लाहोरमधील रस्त्यांची नावे का बदलली जात आहेत?
शाळांनंतर पश्चिम बंगालमधील मदरशांमध्ये ‘वंदे मातरम’ म्हणणे अनिवार्य
स्वीडन दौऱ्यात पंतप्रधान मोदी यांनी क्राउन प्रिन्सेस व्हिक्टोरिया यांचीही भेट घेतली आणि त्यांना मध्य प्रदेशातील प्रसिद्ध गोंड चित्रकला भेट दिली. गोंड जमातीची ही पारंपरिक कला बारीक रेषा, ठिपके आणि आकर्षक रंगांच्या माध्यमातून निसर्ग, प्राणी-पक्षी आणि जंगलांचे सजीव चित्रण करते. याशिवाय, पंतप्रधान मोदी यांनी स्वतः लिहिलेले ‘कन्व्हिनियंट अॅक्शन : कंटिन्यूटी फॉर चेंज’ हे पुस्तकही क्राउन प्रिन्सेस यांना भेट दिले. या पुस्तकात मोदी यांच्या भाषणांचा, विचारांचा आणि धोरणात्मक दृष्टिकोनाचा संग्रह असून सुशासन, विकास, आर्थिक सुधारणा आणि प्रशासनिक कार्यक्षमतेवर भर देण्यात आला आहे.
