ऑपरेशन सिंदूरच्या यशस्वी अंमलबजावणीनंतर आणि दहशतवादाविरोधात भारताच्या ‘शून्य सहिष्णुता’ धोरणाचा संदेश जागतिक स्तरावर पोहोचवण्यासाठी भारत सरकार सात भारतीय खासदारांचे एक प्रतिनिधिमंडळ परदेशात पाठवत आहे. या प्रतिनिधिमंडळात काँग्रेसचे शशी थरूर, भाजपचे रविशंकर प्रसाद, जेडीयूचे संजय कुमार झा, भाजपचे बैजयंत पांडा, डीएमकेच्या कनिमोळी करुणानिधी, राष्ट्रवादी काँग्रेसच्या सुप्रिया सुळे आणि शिवसेनेचे श्रीकांत एकनाथ शिंदे यांचा समावेश आहे. प्रतिनिधिमंडळात समावेश झाल्याबद्दल सुप्रिया सुळे, शशी थरूर आणि संजय झा यांनी पंतप्रधान नरेंद्र मोदींचे आभार मानले आहेत.
राष्ट्रवादी काँग्रेसच्या खासदार सुप्रिया सुळे यांनी सोशल मीडिया प्लॅटफॉर्म ‘एक्स’ वर पोस्ट करत लिहिले, “भारताचे जागतिक स्तरावर प्रतिनिधित्व करणाऱ्या सर्वपक्षीय प्रतिनिधिमंडळाचा भाग होण्याचा मला सन्मान वाटतो. मी ही जबाबदारी नम्रपणे स्वीकारते आणि पंतप्रधान नरेंद्र मोदी, केंद्रीय मंत्री किरेन रिजिजू आणि परराष्ट्र मंत्रालयाचे मनापासून आभार मानते. बारामती लोकसभा मतदारसंघातील जनतेच्या सातत्यपूर्ण पाठिंब्यासाठी मी ऋणी आहे. विदेशात आमचे मिशन हे दहशतवादाविरोधात भारताचा एकजूट आणि दृढ संदेश पोहोचवणे आहे. आपण एक राष्ट्र म्हणून बळकट आणि अडिग आहोत. जय हिंद.”
हेही वाचा..
ओडिशात विपरीत घडलं! वीज पडून १० जन ठार
तेलुगू मध्ये ‘केसरी चैप्टर २ ‘ चा ट्रेलर प्रदर्शित
पीओकेबद्दल रामभद्राचार्य म्हणाले, तो मिळणारच!
सर्वपक्षीय शिष्टमंडळात काँग्रेसने थरूर यांचे नाव वगळले; पण केंद्राने दाखवला विश्वास
जेडीयूचे खासदार संजय झा म्हणाले, “भारतीय सशस्त्र दलांच्या ऑपरेशन सिंदूरच्या पार्श्वभूमीवर, भारताच्या दहशतवादविरोधी शून्य सहिष्णुतेच्या भूमिकेचा जागतिक प्रचार करण्यासाठी सर्वपक्षीय प्रतिनिधिमंडळात समाविष्ट होण्याचा सन्मान मला मिळाला आहे. पंतप्रधान नरेंद्र मोदींनी दहशतवाद संपवण्यासाठी आणि थेट अथवा अप्रत्यक्षपणे दहशतवादाला खतपाणी घालणाऱ्यांना धडा शिकवण्यासाठी घेतलेल्या सातत्यपूर्ण भूमिकेमुळे हे अत्यंत महत्त्वाचे आहे. भारताचे नागरिक आणि राजकीय पक्ष राष्ट्राच्या गौरव व सुरक्षेसाठी एकजुट आहेत. आमच्यासाठी ‘भारत प्रथम’ हेच धोरण आहे. जय हिंद.”
काँग्रेस खासदार शशी थरूर यांनी ‘एक्स’वर लिहिले, “आपल्या देशाच्या दृष्टीकोनाचे पाच प्रमुख राजधानींमध्ये प्रतिनिधित्व करण्यासाठी भारत सरकारने सर्वपक्षीय प्रतिनिधिमंडळात समावेश केल्याचा मला सन्मान वाटतो. जेव्हा राष्ट्रीय हिताची गोष्ट असेल, आणि माझ्या सेवा आवश्यक असतील, तेव्हा मी कधीही मागे हटणार नाही. जय हिंद!”
शिवसेनेचे खासदार श्रीकांत शिंदे यांनी लिहिले, “राष्ट्रहित नेहमीच सर्वोच्च असते. ऑपरेशन सिंदूर आणि सीमापार दहशतवादाविरोधातील भारताच्या सातत्यपूर्ण प्रयत्नांच्या पार्श्वभूमीवर, या महिन्याच्या शेवटी सात सदस्यीय सर्वपक्षीय प्रतिनिधिमंडळ संयुक्त राष्ट्र सुरक्षा परिषदेच्या सदस्य देशांसह महत्त्वाच्या सहयोगी देशांना भेट देणार आहेत. मला या प्रतिनिधिमंडळाचे नेतृत्व करण्याचा मान मिळाला आहे. आंतरराष्ट्रीय समुदायाला आपण ठामपणे सांगणार आहोत की भारतात दहशतवादाला थारा नाही आणि पाकिस्तान आपल्या भूमीत दहशतवादाला प्रोत्साहन देतो. जेव्हा राष्ट्रहिताचा प्रश्न असतो तेव्हा मतभेद नसतात, फक्त कर्तव्य असते. आपल्या देशाची सेवा करणे हा माझ्यासाठी सन्मान आहे आणि मी ही जबाबदारी निष्ठा व समर्पणाने पार पाडेन. यासाठी मी पंतप्रधान नरेंद्र मोदी आणि केंद्र सरकारचे मनापासून आभार मानतो. जय हिंद.”
केंद्रीय मंत्री किरेन रिजिजू यांनी ‘एक्स’ वर लिहिले, “सर्वात महत्त्वाच्या क्षणी भारत एकत्र उभा असतो. सात सदस्यीय सर्वपक्षीय प्रतिनिधिमंडळ लवकरच महत्त्वाच्या सहयोगी देशांना भेट देणार असून, दहशतवादाविरोधात आपल्या ‘शून्य सहिष्णुता’च्या सामूहिक संदेशाला घेऊन जातील.”
