घुसखोरीच्या प्रयत्नात असलेला पाकव्याप्त काश्मीरातील २६ वर्षीय तरुण ताब्यात

जम्मू-काश्मीरमधील पूंछ जिल्ह्यात नियंत्रण रेषेवर (LoC) घुसखोरी करण्याचा प्रयत्न भारतीय लष्कराने हाणून पाडला आहे. या कारवाई दरम्यान, पाकव्याप्त काश्मीरातील (PoK) एका २६ वर्षीय संशयित घुसखोराला ताब्यात घेण्यात आले आहे. प्राथमिक चौकशीत तो पाकव्याप्त काश्मीरमधील अब्बासपूर परिसरातील पोलास गावचा रहिवासी असल्याचे समोर आले आहे. या घटनेनंतर सीमावर्ती भागात सुरक्षा आणखी कडक करण्यात आली असून, लष्कर आणि सुरक्षा यंत्रणांकडून सखोल चौकशी सुरू आहे.

माहितीनुसार, शुक्रवारी पूंछ जिल्ह्यातील कृष्णा घाटी सेक्टरमधील गुलपूर परिसरातून संबंधित व्यक्तीने नियंत्रण रेषा ओलांडून भारतीय हद्दीत प्रवेश करण्याचा प्रयत्न केला. सीमारेषेवर सतर्क असलेल्या भारतीय लष्कराच्या जवानांनी त्याच्या हालचाली संशयास्पद वाटल्यानंतर तात्काळ कारवाई करत त्याला ताब्यात घेतले. ताब्यात घेण्यात आलेल्या व्यक्तीची ओळख मोहम्मद सज्जाद (वय २६) अशी झाली आहे. तो पाकव्याप्त काश्मीरमधील अब्बासपूर जिल्ह्यातील पोलास गावचा रहिवासी असून, मोहम्मद रफीक यांचा मुलगा असल्याची माहिती प्राथमिक चौकशीत समोर आली आहे.

लष्कराने त्याला जवळच्या लष्करी छावणीत हलवले असून, भारतीय लष्कर, गुप्तचर यंत्रणा आणि इतर सुरक्षा दलांची संयुक्त पथके त्याची कसून चौकशी करत आहेत. त्याने भारतात घुसखोरी का केली, त्यामागे कोणाचे मार्गदर्शन होते का, तसेच दहशतवादी संघटनांशी त्याचा काही संबंध आहे का, याचा तपास सुरू आहे. सुरक्षा अधिकाऱ्यांच्या मते, सध्या या प्रकरणातील सर्व शक्यतांचा तपास केला जात आहे. चौकशी पूर्ण होईपर्यंत कोणताही निष्कर्ष काढणे योग्य ठरणार नाही. त्याच्याकडून महत्त्वाची माहिती मिळण्याची शक्यता लक्षात घेऊन विविध तपास यंत्रणा त्याची चौकशी करत आहेत.

हे ही वाचा:

पुढील वर्षाच्या प्रारंभी डोनाल्ड ट्रम्प भारतात येणार?

आता लोकल रेल्वेच्या डब्यातून धर्मांतरणांचे रॅकेट

व्हेनेझुएलात ५० हजार लोक बेपत्ता, पुन्हा भूकंपाचे धक्के

कतारमधील रास लफ्फान दुर्घटनेतील मृत भारतीयांचे पार्थिव भारतात रवाना

दरम्यान, या घटनेनंतर कृष्णा घाटी आणि पूंछ सेक्टरमधील नियंत्रण रेषेवर गस्त वाढविण्यात आली आहे. संवेदनशील भागांमध्ये अतिरिक्त जवान तैनात करण्यात आले असून, इलेक्ट्रॉनिक देखरेख आणि शोधमोहीम अधिक तीव्र करण्यात आली आहे. गेल्या काही महिन्यांपासून नियंत्रण रेषेवर घुसखोरीचे प्रयत्न रोखण्यासाठी भारतीय लष्कराने सतर्कता वाढवली आहे. अत्याधुनिक निगराणी यंत्रणा, ड्रोन आणि नियमित गस्त यांच्या माध्यमातून सीमापार हालचालींवर बारकाईने लक्ष ठेवले जात असून, या कारवाईमुळे आणखी एक संभाव्य घुसखोरीचा प्रयत्न वेळेत उधळण्यात सुरक्षा दलांना यश आले आहे.