अमेरिकेचे अध्यक्ष डोनाल्ड ट्रम्प यांनी भारत-अमेरिका व्यापार कराराचा उल्लेख करत केलेल्या वक्तव्यानंतर बुधवारी भारतातील टेक्सटाइल (कापड) आणि सी-फूड (समुद्री खाद्य) क्षेत्राशी संबंधित शेअर्समध्ये लक्षणीय वाढ नोंदवली गेली. गुंतवणूकदारांना या वक्तव्यानंतर अमेरिकन टॅरिफ (शुल्क) कमी होण्याची शक्यता वाटू लागली आहे. लक्षात घेण्यासारखे म्हणजे, भारतातील सी-फूड आणि टेक्सटाइल कंपन्यांच्या उत्पन्नाचा मोठा भाग अमेरिकन बाजारपेठेतून येतो.
दक्षिण कोरियातील ग्योंगजू येथे झालेल्या एपीईसी सीईओ शिखर परिषदेत ट्रम्प यांनी भारत-अमेरिका व्यापार कराराचा उल्लेख करताना पंतप्रधान नरेंद्र मोदींचे कौतुक केले आणि म्हटले की ते “भारतासोबत एक व्यापार करार करण्याच्या मार्गावर आहेत. मोदींबद्दल बोलताना ट्रम्प म्हणाले की, ते “सर्वात आकर्षक दिसणारे आणि अत्यंत सक्षम नेते आहेत.”
हेही वाचा..
सोनम वांगचुक प्रकरण : सुनावणी पुढे ढकलली
पंतप्रधान मोदींनी जपानच्या पंतप्रधानांशी फोनवर साधला संवाद, कशावर झाली चर्चा?
पंतप्रधान मोदी ३०,३१ ऑक्टोबरला गुजरात, दिल्ली दौऱ्यावर
स्टॅच्यू ऑफ युनिटी येथे ‘एकता परेड’ची रंगीत तालीम
रशियाकडून भारताने तेल खरेदी केल्यामुळे अमेरिकेने भारतावर 50 टक्के टॅरिफ लावले होते. या निर्णयामुळे निर्यात-आधारित टेक्सटाइल आणि सी-फूड कंपन्यांच्या शेअर्समध्ये पूर्वी घसरण झाली होती. मात्र, अमेरिकन टॅरिफमधून सवलत मिळण्याच्या अपेक्षेमुळे, बुधवारी भारतीय सी-फूड उद्योगातील शेअर्स २ ते ४ टक्क्यांनी वाढले, तर टेक्सटाइल शेअर्समध्येही असाच सकारात्मक कल दिसून आला.
भारत आणि अमेरिका यांच्यातील व्यापार करारासाठी दोन्ही देशांमध्ये सातत्याने चर्चा सुरू आहेत. यासाठी प्रतिनिधीमंडळांदरम्यान अनेक फेऱ्यांची बैठक झाली आहे. ट्रम्प प्रशासनाने काही महिन्यांपूर्वी भारताच्या हितावर परिणाम करणाऱ्या कडक धोरणांची घोषणा केली होती. मात्र आता रिपब्लिकन आणि डेमोक्रॅटिक पक्षांचे खासदार भारत-अमेरिका संबंध मजबूत करण्यासाठी एकत्र आले आहेत. गेल्या १० दिवसांत किमान सहा द्विपक्षीय पत्रे आणि ठराव तयार करण्यात आले आहेत, ज्यात भारतीय-अमेरिकन समुदायाच्या हितांचे रक्षण, भारत-अमेरिका भागीदारीला पाठिंबा आणि भारताविरोधी पावले उचलल्याबद्दल प्रशासनाकडून जबाबदारीची मागणी करण्यात आली आहे.
