भाजपाचे पश्चिम बंगालमधील जायंट किलर सुवेंदू अधिकारी यांचे निकटवर्तीय सहकारी आणि वैयक्तिक सहाय्यक चंद्रनाथ रथ यांच्या पश्चिम बंगालमधील उत्तर २४ परगणा जिल्ह्यात गोळ्या झाडून झालेल्या हत्येनंतर दुसऱ्या दिवशी त्यांच्या दुःखी आईने अश्रूंना वाट मोकळी करून देत तृणमूल काँग्रेसवर आरोप केले.
पत्रकारांशी बोलताना हसिरानी रथ यांनी सांगितले की, त्यांच्या मुलाला नियोजित हल्ल्यात “छळ करून मारण्यात आले” आणि दोषींना कठोर शिक्षा देण्याची मागणी केली. “मला दोषींना शिक्षा व्हावी असे वाटते. मी एक आई आहे, मला त्यांना फाशी द्यावी असे वाटत नाही. मला त्यांना जन्मठेप व्हावी असे वाटते,” असे त्या भावनिक स्वरात म्हणाल्या.
हा हल्ला राजकीय हेतूने करण्यात आल्याचा दावा करत त्यांनी आरोप केला की २०२१ मध्ये ममता बॅनर्जी यांचा नंदीग्राममध्ये पराभव झाल्यापासून त्यांच्या कुटुंबाला धमक्या दिल्या जात होत्या.
“भाजप सत्तेत आल्यामुळे त्यांनी हे केले. सत्ताधारी पक्षाचे नेते भडकाऊ वक्तव्य करत होते आणि आम्हाला धमक्या देत होते. त्यांनी म्हटले होते की ४ मेनंतर दिल्लीहून कोणीही आम्हाला वाचवू शकणार नाही, आणि आता त्यांनी त्याचा अर्थ दाखवून दिला,” असे त्यांनी सांगितले.
“माझा मुलगा अपघातात मेला असता तर मला इतके दुःख झाले नसते. पण ज्या प्रकारे त्याला छळून मारण्यात आले, त्या संदर्भात पसरवल्या जाणाऱ्या कथा या तृणमूलने बनवलेल्या आहेत,” असेही त्यांनी म्हटले.
चंद्रनाथ रथ हे माजी भारतीय वायुदल अधिकारी होते आणि अनेक वर्षे अधीकारींसोबत काम करत होते. बुधवारी उशिरा रात्री उत्तर २४ परगणा जिल्ह्यातील मध्यमग्रामजवळ त्यांच्यावर हल्ला करण्यात आला. पोलीस सूत्रांनुसार, रथ हे त्यांच्या स्कॉर्पिओ गाडीतून प्रवास करत असताना एका सँट्रो कारने त्यांच्या वाहनाला ओव्हरटेक करून वेग कमी केला. त्यानंतर मोटारसायकलवरून आलेल्या हल्लेखोरांनी जवळून गोळीबार केला आणि घटनास्थळावरून पळ काढला.
हे ही वाचा:
पाकिस्तानी गुंडांच्या संपर्कातील दोघांना अटक
मुख्यमंत्री मान यांच्या ओएसडीशी संबंधित छापे; रोकड भरलेल्या दोन बॅगा जप्त
भारताच्या निर्यातीचा नवा विक्रम; ८६३ अब्ज डॉलरचा ऐतिहासिक टप्पा पार
“भारताची प्रतिक्रिया दहशतवाद विरोधात ठाम आणि अचूक!”
तपास अधिकाऱ्यांनी सांगितले की रथ यांना सुमारे १० गोळ्या लागल्या असून त्या त्यांच्या छाती, पोट आणि डोक्यात घुसल्या. त्यांना खासगी रुग्णालयात नेण्यात आले, मात्र उपचारादरम्यान त्यांचा मृत्यू झाला. या घटनेनंतर पोलिसांनी राज्यभरात ४३३ जणांना अटक केली असून १,१०० हून अधिक लोकांना ताब्यात घेतले आहे. तसेच या प्रकरणात २०० पेक्षा जास्त गुन्हे नोंदवण्यात आले आहेत.
सध्या तीन स्थानिक गुन्हेगारांची चौकशी सुरू आहे, मात्र मुख्य हल्लेखोर अद्याप फरार आहेत. या घटनेला “पूर्वनियोजित हत्या” आणि “वैयक्तिक नुकसान” असे संबोधत सुवेंदू अधिकारी यांनी भाजप कार्यकर्त्यांना शांतता राखण्याचे आवाहन केले. “आजूबाजूच्या भागात अनेक घटना घडल्या आहेत. पोलीस संपूर्ण प्रकरणाची चौकशी करत आहेत. ही पूर्वनियोजित हत्या आहे. हे माझ्यासाठी वैयक्तिक नुकसान आहे. मी सर्व भाजप कार्यकर्त्यांना शांतता राखण्याचे आवाहन करतो. ही अत्यंत वेदनादायक हत्या आहे,” असे त्यांनी पत्रकारांना सांगितले.
हत्यानंतर काही तासांतच आरोप-प्रत्यारोप सुरू झाले. भाजप नेते अर्जुन सिंग यांनी अभिषेक बॅनर्जी यांच्यावर या हल्ल्याचे “सूत्रधार” असल्याचा आरोप केला. मात्र टीएमसीने हे आरोप फेटाळून लावत हत्येचा निषेध केला. पक्षाने निवेदनात म्हटले की, लोकशाहीमध्ये राजकीय हिंसाचाराला स्थान नाही आणि या प्रकरणाची न्यायालयीन देखरेखीखाली चौकशी व्हावी अशी मागणी केली.
