जंतर-मंतर येथील बेमुदत उपोषणस्थळावरून हटवून सफदरजंग रुग्णालयात दाखल केल्यानंतर पर्यावरण कार्यकर्ते सोनम वांगचुक यांनी प्रथमच आपल्या समर्थकांना संदेश पाठवला आहे. त्यांनी आपल्या रुग्णालयातील वास्तव्याला “बेकायदेशीर नजरकैद” असे संबोधत, २० जुलै (सोमवार) रोजी कॉकरोच जनता पार्टी (CJP) तर्फे आयोजित करण्यात आलेला संसद मोर्चा यशस्वी करण्याचे आवाहन केले आहे.
वांगचुक यांनी या आंदोलनाला “भारताची दुसरी स्वातंत्र्य चळवळ” असे संबोधले असून, हा संदेश रविवारी समोर आला. त्यांच्या उपोषणाच्या २१ व्या दिवशी दिल्ली पोलिसांनी त्यांना जंतर-मंतर येथून हटवून सफदरजंग रुग्णालयात दाखल केले होते.
५९ वर्षीय वांगचुक यांनी हा संदेश पत्नी गीतांजली जे. आंग्मो यांच्यामार्फत पाठवला. चुरगळलेल्या कागदावर लिहिलेल्या या हस्तलिखित संदेशाचा फोटो त्यांच्या अधिकृत एक्स (पूर्वीचे ट्विटर) खात्यावर शेअर करण्यात आला.
‘भीतीमुक्त आणि अन्यायमुक्त भारताची गरज‘
संदेशात वांगचुक यांनी प्रश्नपत्रिका फुटीच्या घटनांसह त्यांच्या उपोषणातील प्रमुख मागण्या आणि सीजेपीच्या व्यापक आंदोलनाचा उल्लेख करत “अन्यायापासून मुक्ती” ही काळाची गरज असल्याचे म्हटले आहे.
हे ही वाचा:
२० जुलैला उपोषण थांबणार! सुरू होणार संसदेतला गोंधळ
वांगचुक प्रकरण गेले न्यायालयात; पत्नीचा दावा
नगरसेवक रमेश म्हात्रे यांचा जामीन रद्द; पुन्हा तुरुंगात जाणार
दिंडीतील वारकऱ्यांसाठी कारुळकरांचा महाप्रसाद
त्यांनी “भीतीमुक्त भारत” आणि “अन्यायमुक्त भारत” घडवण्याचे आवाहन केले. तसेच, स्वतःच्या कथित “बेकायदेशीर नजरकैदेचा” उल्लेख करत त्यांनी भीतीपासून मुक्तीच्या व्यापक संकल्पनेशी त्याची सांगड घालण्याचा प्रयत्न केला.
संसद मोर्चाबाबत अनिश्चितता
दरम्यान, सीजेपीच्या संसद मोर्चाच्या आयोजनाबाबत अद्याप अनिश्चितता कायम आहे. दिल्ली पोलिसांच्या सूत्रांनी दिलेल्या माहितीनुसार, १८ जुलैपर्यंत या मोर्चासाठी सीजेपीने कोणतीही अधिकृत परवानगी मागितलेली नव्हती. तसेच, संसदेचे पावसाळी अधिवेशन सुरू होत असल्याने, जरी संघटनेने परवानगीसाठी अर्ज केला तरी तो मंजूर होण्याची शक्यता अत्यंत कमी असल्याचेही सूत्रांनी सांगितले.
वांगचुक यांच्या प्रकृतीबाबत रुग्णालयाचे निवेदन
रविवारी सफदरजंग रुग्णालयाने जारी केलेल्या आरोग्य बुलेटिनमध्ये वांगचुक यांच्यावर आवश्यक वैद्यकीय उपचार सुरू असून तज्ज्ञ डॉक्टरांचे पथक त्यांच्या प्रकृतीवर सातत्याने लक्ष ठेवून असल्याचे म्हटले आहे.
रुग्णालयाच्या निवेदनानुसार, “सध्या त्यांची जीवनावश्यक शारीरिक लक्षणे (व्हायटल पॅरामिटर्स) स्थिर आहेत. मात्र, रक्तातील काही घटकांमध्ये किरकोळ बदल दिसून येत आहेत. दीर्घकाळ उपोषणामुळे शरीरावर आलेला ताण आणि त्याचे परिणाम लक्षात घेता त्यांना बहुविद्याशाखीय तज्ज्ञांच्या देखरेखीखाली सातत्यपूर्ण वैद्यकीय उपचारांची आवश्यकता आहे.”
यापूर्वी १८ जुलै रोजी रुग्णालयाने सांगितले होते की, उपचार करणाऱ्या डॉक्टरांनी तसेच एम्सच्या स्वतंत्र तज्ज्ञांनी वारंवार समुपदेशन करूनही वांगचुक यांनी शिरेवाटे द्रवपदार्थ (IV Fluids), ओरल रिहायड्रेशन सोल्यूशन (ORS) आणि सर्व औषधे घेण्यास नकार दिला होता. तसेच, त्यांच्या कुटुंबीयांनीही शिफारस करण्यात आलेल्या वैद्यकीय उपचारांसाठी अद्याप संमती दिलेली नव्हती.
दिल्ली पोलिसांची भूमिका
दिल्ली पोलिसांनी स्पष्ट केले आहे की, तज्ज्ञ डॉक्टरांच्या सल्ल्यानुसार आणि दिल्ली उच्च न्यायालयाच्या निर्देशांचे पालन करत अत्यावश्यक वैद्यकीय उपचारांसाठी वांगचुक यांना सफदरजंग रुग्णालयात हलवण्यात आले.
दरम्यान, शुक्रवारी रात्री वांगचुक यांनी प्रकृती खालावत असतानाही उपोषण सुरू ठेवण्याचा निर्धार व्यक्त केला होता. त्यांनी उपोषणादरम्यान आपल्या शरीराचे सुमारे २० टक्के वजन घटल्याचा दावा केला होता.
विशेष म्हणजे, जंतर-मंतरवरून त्यांना हलविण्याच्या दोन दिवस आधी केंद्र सरकारने दिल्ली उच्च न्यायालयाला डॉक्टरांच्या सल्ल्यानुसार वांगचुक यांना आवश्यक ते सर्व वैद्यकीय उपचार उपलब्ध करून दिले जातील, असे आश्वासन दिले होते.
