उत्तर रेल्वेच्या सहाय्यक अभियंता, ट्रॅकमनला लाच घेताना अटक

रेल्वेमधील भ्रष्टाचारावर कारवाई करताना केंद्रीय अन्वेषण विभागाने (सीबीआय) एक मोठी धडक कारवाई केली आहे. सीबीआयने उत्तर रेल्वेच्या चंदौसी विभागात (संभळ, उत्तर प्रदेश) कार्यरत असलेले सहाय्यक मंडल अभियंता संजीव सक्सेना आणि ट्रॅकमन आकाश यांना ३४,००० रुपयांची लाच घेताना रंगेहाथ पकडले. ही कारवाई शुक्रवारी रात्री करण्यात आली. सीबीआयने सापळा रचून दोघांना लाच स्वीकारताना अटक केली. चौकशीनंतर शनिवारी सकाळी दोघांना अधिकृतरित्या अटक करण्यात आली. त्यांना गाझियाबाद येथील विशेष सीबीआय न्यायालयात (कोर्ट क्र. १) हजर करण्यात येणार आहे.

४ जुलै रोजी एका खाजगी ठेकेदाराच्या तक्रारीवरून सीबीआयने ही तक्रार नोंदवली होती. तक्रारदाराने सांगितले की, तो एक खाजगी फर्म चालवतो आणि रेल्वेचे ट्रॅक फिटिंगचे काम करतो. १९ जानेवारी २०२४ रोजी त्याला उत्तर रेल्वेच्या मुरादाबाद विभागाकडून एक टेंडर मिळाले होते. काम पूर्ण झाल्यानंतरही १७,५७,६०५ रुपयांच्या प्रलंबित बीलांच्या बदल्यात अभियंता संजीव सक्सेनाने २% कमिशन म्हणजेच ३४,००० रुपयांची लाच मागितली होती.

हेही वाचा..

भाजपा नेते गोपाळ खेमका यांची गोळ्या झाडून हत्या!

‘डंकी’ प्रकरणात दोघांना अटक

संभल अपघातावर पंतप्रधान मोदींनी व्यक्त केला शोक

पंतप्रधान मोदी अर्जेंटीना दौऱ्यावर

या तक्रारीची गंभीर दखल घेत सीबीआयने एक टीम तयार केली आणि ४ जुलैच्या रात्री सापळा रचला. आरोपी अभियंता आणि ट्रॅकमन ठेकेदाराकडून लाच स्वीकारताच सीबीआयच्या टीमने त्यांना घटनास्थळीच अटक केली. त्यानंतर ५ जुलैच्या सकाळी त्यांना अधिकृतरित्या अटक करण्यात आली. या प्रकरणाचा तपास सीबीआयकडून सुरू आहे. ही कारवाई चंदौसी रेल्वे स्थानकाच्या अभियांत्रिकी विभागात गाझियाबादहून आलेल्या सीबीआय टीमने केली. टीमने IOW व सहाय्यक अभियंता (AEN) कार्यालयातील कागदपत्रांचीही तपासणी केली. याआधी, एप्रिल महिन्यात सीबीआयने उत्तर रेल्वेचे दोन वरिष्ठ अधिकारी एका खाजगी फर्मचे बील मंजूर करण्याच्या बदल्यात ७ लाख रुपयांची लाच घेताना अटक केले होते.