मध्य प्रदेश: महू येथील जामा मशीद परिसरातून चॅम्पियन्स ट्रॉफी विजयानिमित्त काढलेल्या रॅलीवर दगडफेक

आयसीसी चॅम्पियन्स ट्रॉफीमध्ये भारतीय क्रिकेट संघाने न्यूझीलंडवर दमदार विजय मिळवत जेतेपद मिळवले. देशभरात याचा जल्लोष होत असताना मध्य प्रदेशातील महू येथे मात्र या जल्लोषाला गालबोट लागल्याची घटना घडली आहे. महू येथील जामा मशिदीजवळ भारताच्या विजयाचा आनंद साजरा करणाऱ्या विजयी रॅलीदरम्यान संघर्ष झाल्याची माहिती आहे.

भारताच्या विजयाचा आनंद साजरा करणारी एक रॅली महू येथील जामा मशीद परिसरातून जात असताना परिसरातील काही लोकांनी त्यांच्यावर दगडफेक करण्यास सुरुवात केली. यामुळे दोन्ही गटांमध्ये संघर्ष निर्माण झाला. अनेक वाहनांची तोडफोड करण्यात आली आणि हल्लेखोरांनी दोन वाहने आणि दोन दुकाने पेटवून दिली. स्थानिकांच्या म्हणण्यानुसार, विजय रॅली जामा मशीद परिसराजवळ येताच, काही लोकांच्या मोठ्या गटाने त्यांच्यावर दगडफेक करण्यास सुरुवात केली, ज्यामुळे गोंधळ उडाला आणि त्यांना त्यांच्या मोटारसायकली सोडून पळून जावे लागले.

हिंसाचारानंतर, परिस्थिती नियंत्रणात आणण्यासाठी इंदूर ग्रामीण आणि इंदूर शहरातील मोठा पोलिस दल परिसरात तैनात करण्यात आला. महूमध्ये लष्कराचे जवान देखील उपस्थित असून हे जवान लष्करी छावणीचे आहेत. या भागात छावणी असल्यामुळे येथे नेहमीच लष्करी तुकड्या तैनात असतात, त्यामुळे स्वतंत्र सैन्य तैनात करण्याची आवश्यकता नव्हती. “येथे दोन्ही बाजूंमध्ये तणाव निर्माण झाला आणि काही ठिकाणी हिंसाचाराच्या घटना घडल्या आहेत. टीम इंडियाच्या विजयानंतर ही घटना घडली. फटाक्यांमुळे ही घटना घडली. आता परिस्थिती पूर्णपणे नियंत्रणात आहे. मी सर्वांना सांगू इच्छितो की मी कोणत्याही प्रकारच्या खोट्या बातम्यांवर विश्वास ठेवत नाही. येथे पुरेसे सैन्य आहे आणि आम्ही परिसरात गस्त घालत आहोत. घटनेची चौकशी केली जाईल आणि या संदर्भात आवश्यक ती सर्व कारवाई केली जाईल. त्यानुसार, संबंधित लोकांना शिक्षा केली जाईल. आता येथे तीन लोक जखमी झाल्याचे वृत्त आहे. पुढील तपास सुरू आहे,” असे इंदूर ग्रामीण एसपी हितिका वसल यांनी महू घटनेवर सांगितले.

हे ही वाचा:

चॅम्पियन्स ट्रॉफीत भारताने केला झेल सोडण्याचा विक्रम

आयुष्मान कार्डमुळे वृद्धाला मिळाले मोफत उपचार; पंतप्रधान मोदींना धन्यवाद

रोहित सलग बारा वेळा टॉस हरला; ब्रायन लाराशी बरोबरी!

मुंबईतील नागपाड्यात पाण्याची टाकी साफ करताना चार कामगारांचा गुदमरून मृत्यू! 

इंदूरचे जिल्हाधिकारी आशिष सिंह यांना विचारले असता त्यांनी सांगितले की परिस्थिती नियंत्रणात आहे आणि परिसरात सैन्य तैनात करण्यात आले आहे. “हे कसे घडले ते नंतर कळेल. सध्या परिस्थिती नियंत्रणात आहे,” असे ते म्हणाले.