राज्याचे उपमुख्यमंत्री एकनाथ शिंदे यांच्या हेलिकॉप्टरला गुरुवारी दुपारी ठाणे जिल्ह्यातील मुरबाड परिसरात जात असताना अचानक आलेल्या वादळी हवामानाचा फटका बसला. सुदैवाने वैमानिकाने प्रसंगावधान राखत हेलिकॉप्टर सुरक्षितपणे मुंबईतील जुहू हेलिपॅडवर उतरवले. या घटनेत कोणतीही जीवितहानी झाली नसून एकनाथ शिंदे आणि त्यांच्यासोबतचे अधिकारी सुरक्षित असल्याची माहिती समोर आली आहे.
हे ही वाचा:
सोन्यात गुंतवणुकीला डिजिटल टच; ‘EGR’ काय आहे?
ताज आणि ट्रायडंट हॉटेलला दहशतवादी हल्ल्याची धमकी देणारा ताब्यात
परदेशी नोकरीचे आमिष दाखवून ‘सायबर गुलामगिरी’
पश्चिम बंगालला स्वतंत्र राष्ट्र घोषित करा…बांगलादेशचा नेता नुरुल हुडाचे फुत्कार
मिळालेल्या माहितीनुसार, उपमुख्यमंत्री एकनाथ शिंदे हे कल्याण-मुरबाड भागातील एका लग्न समारंभासाठी जात होते. त्यावेळी राज्यात अनेक भागांत अवकाळी पावसासह जोरदार वारे आणि वादळी परिस्थिती निर्माण झाली होती. मुरबाडच्या दिशेने उड्डाण सुरू असतानाच हवामान अचानक बिघडले आणि हेलिकॉप्टर वादळाच्या कचाट्यात सापडले. परिस्थिती गंभीर होत असल्याचे लक्षात येताच वैमानिकाने तातडीने सुरक्षिततेचा निर्णय घेत हेलिकॉप्टर पुन्हा मुंबईच्या दिशेने वळवले.
वादळी वाऱ्यांमुळे दृश्यमानता कमी झाली होती. त्यामुळे मुरबाडमध्ये नियोजित लँडिंग टाळण्यात आले. अखेर हेलिकॉप्टर मुंबईतील जुहू येथील पवनहंस हेलिपॅडवर सुरक्षित उतरवण्यात आले. या संपूर्ण घटनेदरम्यान काही काळ तणावाचे वातावरण निर्माण झाले होते. मात्र वैमानिकाच्या सतर्कतेमुळे मोठा अनर्थ टळल्याचे सांगितले जात आहे.
