तमिळनाडूमध्ये सरकार स्थापनेच्या राजकारणाला आता मोठे वळण मिळाले असून, अम्मा मक्कल मुनेत्र कळघम (AMMK) प्रमुख टीटीव्ही दिनाकरन यांनी अभिनेता विजय यांच्या तमिळगा वेत्री कळघम (TVK) पक्षाविरोधात पोलिसांत तक्रार दाखल केली आहे. TVK ने आमदाराच्या समर्थनाचे बनावट पत्र वापरल्याचा गंभीर आरोप दिनाकरन यांनी केला आहे.
तमिळनाडू विधानसभा निवडणुकीनंतर राज्यात त्रिशंकू परिस्थिती निर्माण झाली आहे. विजय यांच्या TVK पक्षाने १०८ जागा जिंकल्या असल्या तरी सरकार स्थापनेसाठी आवश्यक बहुमतापासून पक्ष काही जागांनी दूर आहे. त्यामुळे लहान पक्ष आणि अपक्ष आमदारांचा पाठिंबा मिळवण्यासाठी जोरदार राजकीय हालचाली सुरू आहेत. याच पार्श्वभूमीवर AMMK च्या एकमेव आमदार एस. कामराज यांच्या समर्थनपत्रावरून मोठा वाद निर्माण झाला.
दिनाकरन यांनी आरोप केला की, TVK ने राज्यपालांकडे सादर केलेले समर्थनपत्र बनावट असून त्याद्वारे AMMK चा पाठिंबा असल्याचा खोटा दावा करण्यात आला. त्यांनी राज्यपालांची भेट घेऊन या प्रकरणाची चौकशी करण्याची मागणी केली. तसेच संबंधितांवर फौजदारी कारवाई व्हावी म्हणून पोलिसांत अधिकृत तक्रारही दाखल केली.
हे ही वाचा:
‘सोनार बांगला’ च्या दिशेने आम्ही काम करू!
ऑपरेशन सिंदूर : अचूकतेतून उलगडणारी कथा
जायंट किलर सुवेंदू आता पश्चिम बंगालचे ‘अधिकारी’
क्रिकेटनंतर ‘टॅक्स पिच’वरही महेंद्रसिंह धोनी अव्वल
दरम्यान, TVK ने हे सर्व आरोप फेटाळून लावले आहेत. पक्षाने एक व्हिडिओ प्रसिद्ध करत AMMK आमदार एस. कामराज स्वतः समर्थनपत्र लिहित असल्याचा दावा केला. TVK च्या म्हणण्यानुसार, कामराज यांनी स्वेच्छेने विजय यांच्या पक्षाला पाठिंबा दिला असून दिनाकरन चुकीची माहिती पसरवत आहेत. पक्षाने “आम्हाला कोणत्याही प्रकारच्या सौदेबाजीची गरज नाही,” असेही स्पष्ट केले.
या राजकीय संघर्षात आणखी एक महत्त्वाची घडामोड म्हणजे दिनाकरन यांनी AIADMK नेते एडप्पडी के. पलानीस्वामी यांना मुख्यमंत्रीपदासाठी पाठिंबा जाहीर केला आहे. त्यांनी राज्यपालांना भेटून AIADMK ला सरकार स्थापनेसाठी निमंत्रण द्यावे अशी मागणी केली. त्यामुळे तमिळनाडूमधील सत्तासंघर्ष अधिकच तीव्र झाला आहे.
राज्यातील या घडामोडींमुळे पुढील सरकार कोण स्थापन करणार याबाबत मोठी उत्सुकता निर्माण झाली आहे. बनावट पत्र, आमदारांची फोडाफोड आणि आरोप-प्रत्यारोपांमुळे तमिळनाडूचे राजकारण सध्या चांगलेच तापले आहे.
