अयोध्या रामजन्मभूमी मंदिराशी संबंधित कथित अपहार आणि चोरी प्रकरणावरून राजकारण तापले; भाजपाचे अखिलेश यादवांवर गंभीर आरोप, व्हीएचपीची प्रियांका गांधींसह अनेक नेत्यांच्या चौकशीची मागणी
अयोध्या रामजन्मभूमी मंदिराशी संबंधित कथित अपहार आणि चोरीच्या प्रकरणावरून राजकीय वातावरण चांगलेच तापले आहे. भारतीय जनता पक्षाने (भाजप) समाजवादी पक्षाचे अध्यक्ष अखिलेश यादव यांच्यावर गंभीर आरोप केले आहेत. दुसरीकडे, विश्व हिंदू परिषदेने (व्हीएचपी) काँग्रेस नेत्या प्रियांका गांधी वाड्रा यांच्यासह अनेक विरोधी पक्षांच्या नेत्यांची चौकशी करण्याची मागणी तपास अधिकाऱ्यांकडे पत्राद्वारे केली आहे.
टिन्नू यादव – अखिलेश यादव फोनवर संभाषण
भाजपाचे राष्ट्रीय प्रवक्ते अजय आलोक यांनी दावा केला की, रामजन्मभूमी मंदिरातील कथित अपहार प्रकरणातील आरोपी रामाशंकर यादव उर्फ टिन्नू यादव यांचे समाजवादी पक्षाचे अध्यक्ष अखिलेश यादव यांच्याशी अनेक वेळा दूरध्वनीवर संभाषण झाले होते. ते म्हणाले, “समाजवादी पक्षाचे वास्तव आता हळूहळू समोर येत आहे. टिन्नू यादव यांचे अखिलेश यादव यांच्याशी अनेक वेळा फोनवर बोलणे झाल्याची माहिती समोर आली आहे. या प्रकरणाचे एक-एक पैलू उघड होत जातील तसे देशाला या चोरीमागे नेमके कोण होते हे समजेल.”
“अजून अनेक खुलासे बाकी”
अजय आलोक म्हणाले की, या प्रकरणात अजून अनेक तथ्ये समोर येणे बाकी आहे. ते म्हणाले, “समाजवादी पक्षाला यापूर्वीही संत-महंतांच्या रोषाला सामोरे जावे लागले होते आणि यापुढेही त्यातून सुटका होणार नाही.”
दिग्विजय सिंह यांच्यावरही टीका
भाजप नेत्यांनी काँग्रेसचे ज्येष्ठ नेते दिग्विजय सिंह यांच्यावरही जोरदार टीका केली. ते म्हणाले, “दिग्विजय सिंह हे भगवान राम यांचे सर्वात मोठे विरोधक आणि नास्तिक आहेत.” यापूर्वी दिग्विजय सिंह यांनी ‘सद्बुद्धी यज्ञात’ सहभागी होत राम मंदिर उभारणीसाठी जमा झालेल्या देणगीत कथित अनियमितता झाल्याचा आरोप करत न्यायालयात जाणार असल्याचे म्हटले होते. तसेच, न्यायालयाने देणगीच्या वापरात गैरव्यवहार झाल्याचे आढळल्यास आपण दिलेली देणगी परत मागून ती इतर मान्यताप्राप्त धार्मिक संस्था किंवा शंकराचार्य ट्रस्टला दान करू, असेही त्यांनी सांगितले होते.
हे ही वाचा:
एम्बाप्पेचा सुवर्ण वार! फ्रान्सची क्वार्टर फायनलमध्ये दिमाखदार एन्ट्री
ट्रम्प म्हणाले, खामेनींंच्या अंत्यदर्शनाला आलेल्या नेत्यांना लक्ष्य केले असते, पण…
बाबर आजम पुन्हा पाकिस्तानचा कसोटी कर्णधार!
क्रिप्टोचं ‘ब्लॅक नेटवर्क’ अमेरिकेसाठी डोकेदुखी
“पावती दाखवा, व्याजासह पैसे परत करू”
दिग्विजय सिंह यांच्या वक्तव्यावर प्रतिक्रिया देताना अजय आलोक म्हणाले, “राम मंदिरासाठी दिलेली देणगी परत मागण्याची भाषा करताना त्यांना लाज वाटली पाहिजे. आधी त्यांनी देणगीची पावती दाखवावी आणि ती वर्तमानपत्रात प्रसिद्ध करावी. त्यानंतर राम मंदिर ट्रस्ट त्यांना व्याजासह त्यांचे पैसे परत करेल, कारण अशा नास्तिकांची देणगी भगवान रामांच्या चरणी पोहोचू नये.”
याच कार्यक्रमात दिग्विजय सिंह यांनी स्वतःवर होणारे धर्मविरोधी असल्याचे आरोप फेटाळले. ते म्हणाले की, ते नेहमीच सनातन परंपरेचे पालन करत आले आहेत, नियमित धार्मिक विधी करतात आणि नर्मदा परिक्रमा देखील पूर्ण केली आहे.
विश्व हिंदू परिषदेची प्रियांका गांधींवर प्रश्नचिन्ह
दरम्यान, विश्व हिंदू परिषदेचे (व्हीएचपी) आंतरराष्ट्रीय अध्यक्ष आणि ज्येष्ठ विधिज्ञ आलोक कुमार यांनी तपास अधिकाऱ्यांना पत्र लिहून प्रियांका गांधी वाड्रा, रामगोपाल यादव, अरविंद केजरीवाल, संजय सिंह यांच्यासह अनेक नेत्यांच्या सार्वजनिक वक्तव्यांची चौकशी करण्याची मागणी केली आहे.
तपास यंत्रणेकडून चौकशीची मागणी
पत्रात म्हटले आहे की, या नेत्यांनी रामजन्मभूमी मंदिरासाठी जमा झालेल्या देणगीत सुमारे २०,००० कोटी रुपयांपर्यंत आर्थिक गैरव्यवहार झाल्याचा आरोप केला आहे. काही वक्तव्यांमध्ये मंदिराशी संबंधित व्यक्तींवर कोट्यवधी रुपयांच्या अपहाराचे तसेच जमीन खरेदीतील अनियमिततेचे आरोप करण्यात आले आहेत.
व्हीएचपीने मागणी केली आहे की, हे आरोप करणाऱ्या नेत्यांना तपास यंत्रणेसमोर चौकशीसाठी बोलावण्यात यावे आणि त्यांनी हे आरोप कोणत्या आधारावर केले, ही माहिती त्यांना कुठून मिळाली आणि त्यांच्या दाव्यांना पाठिंबा देणारे कोणते दस्तऐवज किंवा पुरावे आहेत का, याबाबत विचारणा करण्यात यावी.
“पुरावे मिळाल्यास तपासाला मदत होईल”
व्हीएचपीने आपल्या पत्रात म्हटले आहे की, आरोप करणाऱ्या नेत्यांनी विश्वासार्ह पुरावे सादर केल्यास तपास यंत्रणांना सत्यापर्यंत पोहोचण्यास मदत होईल. याशिवाय, व्हीएचपीने सोशल मीडिया प्लॅटफॉर्म एक्सवर पोस्ट करून सांगितले की, त्यांच्या आंतरराष्ट्रीय अध्यक्ष आलोक कुमार यांनी रामजन्मभूमी प्रकरणात प्रियांका गांधी वाड्रा आणि इतर नेत्यांच्या सार्वजनिक वक्तव्यांची चौकशी करण्याची मागणी केली आहे.
